Amurka ta aike da ƙaramar tawagar sojoji zuwa Nijeriya, inji janar ɗin da ke jagorantar rundunar Amurka a Afrika a ranar Talata.
Wannan ne karo na farko da aka amince a fili da kasancewar sojojin Amurka a cikin ƙasar Nijeriya tun bayan harin sama da Amurka ta kai a ranar Kirsimeti.
Shugaba Donald Trump ne ya ba da umurnin kai hare-haren sama kan abin da ya bayyana a matsayin sansanonin ƙungiyar Islamic State a Nijeriya a watan Disamba, tare da cewa za a iya ƙara ɗaukar matakan soji daga Amurka a can.
A baya kamfanin dillancin labarai na Reuters ya ruwaito cewa Amurka tana gudanar da jiragen leƙen asiri a sararin samaniyar Nijeriya daga Ghana tun aƙalla ƙarshen watan Nuwamba.
Babban janar ɗin ya ce an aike da tawagar Amurka ne bayan ƙasashen biyu sun amince cewa akwai buƙatar ƙara ƙoƙari wajen yaƙi da barazanar ta’addanci a Yammacin Afrika.
“Wannan ya haifar da ƙarin haɗin gwiwa tsakanin ƙasashen mu, ciki har da ƙaramar tawagar Amurka da ke kawo wasu ƙwarewa na musamman daga Amurka,” inji Janar Dagvin R.M. Anderson, shugaban rundunar sojin Amurka ta Afrika (AFRICOM), yayin taron manema labarai a yau Talata.
Anderson bai bayar da ƙarin bayani kan irin girma da nauyin aikin tawagar ba.
Ministan Tsaro, Christopher Musa, ya tabbatar da cewa wata tawaga tana aiki a Nijeriya, amma shi ma bai yi ƙarin bayani ba.
Wani tsohon jami’in Amurka ya ce alamar hakan na nuna tawagar Amurka na taka muhimmiyar rawa wajen tattara bayanan sirri da kuma taimaka wa sojojin Nijeriya su kai hare-hare kan ƙungiyoyin da ke da alaƙa da ta’addanci.
Nijeriya ta fuskanci matsin lamba mai tsanani daga Amurka bayan Shugaba Trump ya zargi ƙasar da ke Yammacin Afrika da gazawa wajen kare Kiristoci daga mayaƙa masu iƙirarin Musulunci da ke aiki a yankin arewa-maso-yamma.
Gwamnatin Nijeriya ta musanta zargin tsananta wa Kiristoci da gangan, tana cewa tana kai hari ne kan mayaƙan Musulunci da sauran ƙungiyoyin ‘yan bindiga da ke kai hare-hare ga fararen hula—Kirista da Musulmi.
Mayaƙan Boko Haram da na Islamic State West Africa Province (ISWAP) dai sun ƙara tsananta hare-hare kan ayarin motocin sojoji da fararen hula, yayin da arewa-maso-yamma ke ci gaba da zama cibiyar tashin hankalin Musulunci da ya shafe shekaru 17.
Rundunar sojin Amurka ta Afrika (AFRICOM) ta ce an kai harin a Jihar Sokoto tare da haɗin gwiwar hukumomin Nijeriya, kuma harin ya kashe mayaƙan ISIS da dama.
Harin ya biyo bayan gargaɗin da Trump ya fara bayarwa a ƙarshen Oktoba, inda ya ce Kiristanci na fuskantar “barazanar wanzuwa” a Nijeriya, tare da barazanar shiga tsakani ta soji a ƙasar kan abin da ya bayyana a matsayin gazawar dakatar da tashin hankalin da ake yi wa al’ummar Kirista.
