Rundunar sojin Nijeriya a yau Juma’a ta ƙaddamar da Babbar Kotun Soja domin gurfanar da jami’an da ake zargi da kitsa juyin mulki, lamarin da ya nuna fara shari’ar a hukumance.
Kamfanin Dillancin Labarai na Nijeriya (NAN) ya ruwaito cewa an kawo jami’an da ake tuhuma wurin zaman kotun, wato Guards Brigade Scorpion Mess da ke Asokoro, da misalin ƙarfe 8:53 na safe ƙarƙashin tsauraran matakan tsaro.
Sai dai an hana ‘yan jarida shiga cikin ɗakin kotun yayin da aka fara shari’ar a rufe.
An kuma ga wasu lauyoyi masu zaman kan su sun isa wurin tun kafin ƙaddamar da kotun, abin da ke nuna akwai wakilan shari’a na waɗanda ake tuhuma.
Zaman kotun ya nuna fara tsarin shari’ar cikin gida na rundunar soji bayan watanni ana gudanar da bincike kan wannan zargin makircin juyin mulki.
Lamarin ya samo asali tun a watan Oktoban 2025 lokacin da aka kama kimanin jami’an soja 16 masu aiki, ciki har da manya da ƙanana, bisa zargin aikata laifukan rashin ɗa’a a aikin soja.
Sai dai binciken da hukumomin soji suka yi daga baya ya tabbatar da cewa wasu daga cikin jami’an suna da tambayoyin da za su amsa dangane da zargin yunƙurin kifar da gwamnatin da kundin tsarin mulki ya assasa, lamarin da ya kai ga yanke shawarar gurfanar da su a gaban kotun soja.
Kamfanin Dillancin Labarai na Nijeriya ya ruwaito cewa an kawo fiye da jami’ai 30 da ake tuhuma cikin wata motar safa ƙirar Marco Polo.
A wani labarin mai nasaba da wannan, tun da farko Gwamnatin Tarayya ta gurfanar da wasu fararen hula da tsofaffin jami’an soja a gaban Babbar Kotun Tarayya da ke Abuja kan wannan zargin juyin mulki.
Waɗanda ake tuhuma, ciki har da wani ritaya Manjo Janar da kuma jami’in ‘yan sanda mai aiki, an tuhume su da laifuka masu nasaba da cin amanar ƙasa da ta’addanci.
Dukkan su sun musanta zarge-zargen da ake musu.
Daga bisani kotun ta bayar da umurnin ci gaba da tsare su har sai an saurari buƙatun su na beli.
Gudanar da waɗannan shari’o’i a layi biyu na nuna tsarin da ake bi, inda jami’an soja masu aiki ke fuskantar kotun soja, yayin da fararen hula da tsofaffin jami’an soja ke fuskantar shari’a a kotunan farar hula.
Har zuwa lokacin haɗa wannan rahoto, ba a samu ƙarin bayani kan yadda shari’ar kotun sojan ke gudana ba.
