Ƙasar Iran ta bayyana cewa Mashigin Hormuz zai koma ƙarƙashin “tsauraran matakan kulawa” saboda killacewar da Amurka ta yi wa tashoshin ruwa na ƙasar ta.
Kafafen yaɗa labarai na ƙasar sun ce rundunar haɗin gwiwar sojojin Iran ta fitar da sanarwa kan halin da ake ciki a Mashigin Hormuz.
A jiya, Shugaba Donald Trump ya jaddada cewa Amurka za ta ci gaba da killace tashoshin jiragen ruwan Iran a yankin Persian Gulf, duk da cewa Iran ta sassauta rufe wannan muhimmiyar hanyar jigilar kaya, wadda take da matuƙar muhimmanci wajen fitar da mai a duniya.
Mai magana da yawun Babbar Hedikwatar Hazrat Khatam al-Anbiya ya ce wannan hanyar ruwa za ta “koma yadda take a baya” ƙarƙashin tsauraran matakan kulawa saboda Amurka ta ƙi janye killacewar.
A halin yanzu ba a tabbatar ba ko hakan na nufin mashigin zai sake kusan rufewa gaba ɗaya, bayan an ga zirga-zirgar jiragen ruwa na ƙaruwa da safiyar yau.
Ga cikakken bayanin sojojin:
“Jamhuriyar Musulunci ta Iran, bayan yarjejeniyoyin da aka cimma a tattaunawa a baya, ta amince cikin gaskiya da ba da izinin wucewar adadi kaɗan na tankokin mai da jiragen kasuwanci ta Mashigin Hormuz cikin tsari mai kyau.
“Abin takaici, Amurkawa… suna ci gaba… da abin da ake kira killacewa.
“Saboda haka, an mayar da ikon Mashigin Hormuz yadda yake a baya, kuma wannan mashigi mai muhimmanci yana ƙarƙashin tsauraran kulawa da ikon sojojin ƙasa.”“
Matukar Amurka ba ta kawo ƙarshen cikakken ‘yancin zirga-zirgar jiragen ruwa daga Iran zuwa inda suke nufa da kuma daga inda suke nufa zuwa Iran ba, halin da ake ciki a Mashigin Hormuz zai ci gaba da kasancewa ƙarƙashin tsattaurar kulawa kamar yadda take a baya.”
