Dakarun rundunar Sojojin Nijeriya na Operation Enduring Peace waɗanda aka jibge a garin Manchok a Jihar Kaduna, tare da karin goyon bayan rundunar musamman ta Special Forces Tactical Team, sun cafke wasu ɗimbin alburusai masu nauyi da kuma kayayyakin da ake zargin na haɗa bamabamai ne a yayin wani bincike na musamman da suka gudanar a jihar.
Jami’in yaɗa labarai na rundunar haɗin gwiwa ta Operation Enduring Peace, Kyaftin Chinonso Polycarp Oteh, ya bayyana a cikin wata sanarwar manema labarai cewa lamarin ya faru ne da misalin ƙarfe 11:45 na safe a ranar Alhamis, 16 ga Afrilu, 2026, kusa da Makarantar Sakandare ta Maza da ke kan hanyar Manchok zuwa Jos.
Ya ƙara da cewa wata mota ƙirar Opel Wagon mai launin shuɗi mai duhu, wadda ke ɗauke da lambar rajista NSR 154 TA Kano, na ɗauke da fasinjoji bakwai ne a cikin ta.
Bayan dakatar da motar, dakarun sun gudanar da cikakken bincike wanda ya kai ga gano wani babban tarin albarusai masu haɗari da aka ɓoye a cikin motar.
Kayayyakin da aka samu sun haɗa da harsasai guda 569 na bindigar harbo jirgin sama (Anti-Aircraft, AA) mai girman 12.7mm, da wasu manyan makamai masu saurin gaske, da kuma harsasai guda 189 na bindigar 7.62mm da aka riga aka harba.
Bugu da ƙari, binciken ya kuma bankaɗo wasu tsofaffin wayoyin hannu na GSM, “waɗanda masana fasaha ke yawan bayyana su a matsayin muhimman sassan da ake amfani da su wajen ƙera bamabamai masu fashewa daga nesa.”
A yayin tambayoyin farko a wurin, direban motar, wanda aka bayyana sunan sa a matsayin Malam Khalifa Bawa, ya yi ƙoƙarin nesanta kan sa da kayan, inda ya ce kayan suna cikin kaya ne da aka tura (waybill).
Bawa ya yi iƙirarin cewa wani mutum da ba a san ko wanene ba shi ne ya ba shi kayan, kuma ya ce ba shi da wata hanyar tuntuɓar ko bayanin wanda ya aiko da kayan ko wanda za a kai wa.
Bawa ya yi iƙirarin cewa wani mutum da ba a san ko wanene ba shi ne ya ba shi kayan, kuma ya ce ba shi da wata hanyar tuntuɓar ko bayanin wanda ya aiko da kayan ko wanda za a kai wa.
A halin yanzu, dukkan waɗanda ke cikin motar, ciki har da wanda ake zargi, tare da motar da kayayyakin da aka kama, suna tsare “domin gudanar da cikakken bincike na ƙwaƙwaf da kuma zurfafa bincike.”
Oteh ya ce: “Dakarun suna ƙoƙarin gano inda aka samo waɗannan kaya da kuma gano babbar hanyar sadarwar da ke da hannu a ƙoƙarin safarar waɗannan kayan yaƙi daga jiha zuwa jiha.”
