Hukumar Hana Sha da Fataucin Miyagun Ƙwayoyi ta Ƙasa (NDLEA) ta ce ta samu gagarumar nasara kama wani Mohammed Ali Abubakar da aka fi sani da Bello Karama, wanda ake zargin babban mai safarar ƙwayoyi ne, tare da wasu mutane biyar masu aiki a filin jirgin Malam Aminu Kano (MAKIA) da ake zargi da yi wa mahajjata cushen ƙwayoyi a cikin kayan su, yayin tafiya Saudiyya.
Cikin sanarwar da Kakakin Hukumar, Femi Babafemi, ya fitar bayan taron manema labarai a hedikwatar NDLEA ta ƙasa da ke Abuja a ranar Litinin, ya bayyana cewa binciken NDLEA ya gano cewa mutanen sun shirya lodin jakunkuna shida a jirgin Ethiopian Airline daga Kano zuwa Jeddah, a ranar 6 ga Agusta, 2025.
Ya ce uku daga cikin jakunkunan na ɗauke da ƙwayoyi, aka cusa cikin kayan waɗanda ba su ji ba, ba su gani ba, labarin da ya jefa su hannun jami’an tsaro a Saudiyya, inda a yanzu haka suna can a tsare.
Waɗanda abin ya ritsa da su, su ne Maryam Hussain Abdullahi, Abdullahi Bahijja Aminu da Abdulhamid Saddiq, waɗanda suka je aikin Umrah.
Sanarwar ta ce sun isa Saudiyya ne ba tare da sanin cewa an saka wa waɗannan jakunkuna da ƙwayoyi ba, abin da ya jawo aka tsare su a Jeddah.
NDLEA ta ce an gano Bello Karama shi ne ya kawo jakunkunan, inda daga baya ya bi jirgin Egypt Air zuwa Jeddah, yayin da ya bar jakunkunan da aka saka musu sunayen waɗannan matafiyan a Ethiopian Airline.
Babafemi ya ce an riga an kama mutane shida cikin waɗanda ake zargi da hannu, kuma sun amsa laifin su, tuni an gurfanar da huɗu a kotu.
Waɗanda aka gurfanar sun haɗa da Abubakar Abdulbasit, Murtala Akande, Olalekan da Yayock.
NDLEA ta tabbatar da cewa ma’aikatan filin jirgin saman na Kano masu hannu a harƙallar cushen ƙwayoyin sun amsa laifin su. Sun ce an biya kowanen su Naira 100,000, inda suka cusa ƙwayoyin a jakunkuna biyu kowanen su, tare da manna masu sunayen matafiyan waɗanda ba na su ba ne.
Waɗanda suka yi wannan harƙallar su ne Celestine Emmanuel Yayock da Jazuli Kabiru, waɗanda ma’aikatan Kamfanin Dakon Kaya na SAHCO ne da ke filin jirgin MAKIA.
Najeriya Za Ta Karɓo Waɗanda Aka Tsare A Saudiyya:
Babafemi ya bayyana cewa shi da kansa ya jagoranci tawagar jami’an NDLEA, inda suka je Jeddah, suka samu jami’an hukumar yaƙi da fataucin miyagun ƙwayoyin ƙasar, suka binciki jakunjunan.
Ya ce nan ba da daɗewa ba za a saki waɗanda aka tsare a Saudiyya, bayan an tabbatar da ba su ne suka aikata laifin shiga ƙasar da ƙwayoyin ba.
