Mai Alfarma Sarkin Musulmi, Sa’ad Abubakar III, ya yi gargaɗi cikin ɓacin rai cewa martabar kotunan shari’u a Najeriya na ci gaba da zubewa, yayin da alƙalai ke hada-hadar cinikin hukuncin kotu ga marasa gaskiya.
Ya ce yanzu a kotuna hukunci ya zama iyar kuɗin ka, iyar shagalin ka. Ya ce idan ka ga marar gaskiya a kotu, to talaka ne. Attajirai kuwa ko sun aikata laifuka, to hukunci baya hawa kan su.
Sarkin Musulmi ya yi wannan ƙakubale ne a ranar Lahadi, yayin da yake magana a matsayin Baƙo Mai Jawabi, wurin taron shekara-shekara na Ƙungiyar Lauyoyi ta Ƙasa (NBA), a Enugu.
Ya yi zargin cewa martabar kotuna ta zube ƙasa warwas, sanadiyyar harƙalla da cuwa-cuwar sayar wa maras gaskiya hukuncin da bai cancanta ba.
“Lokutan Najeriya na ci gaba da lalacewa, darajar su sai tseren dushewa take yi. Sun zama mai kuɗi shi ne mai gaskiya, talaka shi ne mai laifi. Duk irin laifin da mai kuɗi ya tafka, ko an kai shi kotu, ba za a yi komai ba. Za ka gan shi kan titi yana fankama abin sa.”
Daga nan ya jinjina wa lauyoyi tare da kira su ci gaba da aikin su bisa ƙa’ida, ƙwarewa da kuma gaskiya.
Ya ce wanzar da adalci yayin yanke hukunci shi ne ginshiƙin zaman lafiya a cikin al’umma.
