Ministan Tsaro, Janar Christopher Gwabin Musa (mai ritaya), ya sake jaddada aniyar Nijeriya ta sabunta rundunonin sojin ta ta hanyar haɗin gwiwar dabaru, bunƙasa ƙwarewar cikin gida, musayar fasaha, da ɗorewar haɗin gwiwar masana’antar tsaro.
Ministan ya bayyana haka kwanan nan yayin ziyarar aiki da ya kai ƙasar Monako tare da manyan jami’an ma’aikatar.
Ya yi wannan bayani ne dangane da aiwatar da shirin da aka gabatar na “Multi-domain Hybrid Intelligence Shield” (HIS) ga Ma’aikatar Tsaro, wanda shi da tawagar sa suke tattaunawa a kai da kamfanin MARSS UK Ltd da abokin hulɗar su na Nijeriya, MPS Mikopowers Ltd.
Tawagar ta samu tarba daga jami’an MARSS UK Ltd da MPS Mikopowers Ltd, waɗanda suka gabatar da cikakkun bayanai tare da nuna yadda tsarin NiDAR na haɗaɗɗen umurni da sarrafawa ke aiki kai-tsaye, da fasahohin yaƙi da jiragen sama marasa matuƙa (drone), dandamalin sa ido na tafi-da-gidan-ka, da hanyoyin tsaron iyakoki da aka tsara domin ƙarfafa ƙarfin tsaro da kariyar Nijeriya.
Ziyarar ta mayar da hankali ne kan gwaje-gwajen aiki kai-tsaye, tattaunawar fasaha, da shawarwari na dabaru da ke da nufin inganta tsarin tsaron ƙasa na Nijeriya ta hanyar ingantattun fasahohin umurni, sarrafawa, sa ido, da haɗaɗɗun hanyoyin tsaro.
Musa ya jaddada muhimmancin gina ƙwarewar aiki ta cikin gida yayin da ake cin gajiyar ƙwarewar ƙasashen waje domin tunkarar sabbin barazanar tsaro, ciki har da ta’addanci, rashin tsaron iyakoki, haƙar ma’adinai ba bisa ƙa’ida ba, fashin teku, da kuma ƙarin barazanar da jiragen sama marasa matuƙa ke haifarwa.
Ya tuna cewa ma’aikatar ita ce cibiyar tsara dabarun tsarin tsaron ƙasar.
Ya ce: “Saboda haka dole ne mu yi amfani da fasaha wajen tattara bayanan sirri, sa ido, da ayyukan sabis na ci gaba. Muna da abokan hulɗa da ƙawayen da ke shirye su tallafa mana. Za mu tuntuɓe su domin mu yi aiki tare a matsayin ƙungiya.”
Yayin tattaunawar, tawagar Nijeriya ta kalli gwaje-gwajen aiki kai tsaye na tsarin gano abubuwa ta radar, tantance barazana da basirar wucin gadi (AI) ke taimakawa, damar daƙile jiragen sama marasa matuƙa, da hanyoyin haɗaɗɗen tsarin umurni da sarrafawa na ƙasa.
Tattaunawar ta kuma shafi shirin kafa cibiyoyin umarni na ƙasa da na yankuna, rundunonin mayar da martani masu tafi-da-gidan-ka, da kuma Cibiyar Ƙwarewa ta Musamman domin kwaikwayon atisaye, horo, da bunƙasa manufofin aiki.
Mataimakiyar Daraktar Yaɗa Labarai da Hulɗa da Jama’a ta Ma’aikatar Tsaro, Enderline Chukwu, ta ce a cikin wata sanarwar manema labarai: “Ziyarar ta ba da dama don tattaunawa kan haɗin gwiwar masana’antar tsaro, tallafa wa samar da kayayyaki a cikin gida, haɗa fasaha, da shirye-shiryen haɗin gwiwa na dogon lokaci tsakanin cibiyoyin tsaron Nijeriya da masu ruwa da tsaki na ƙasa da ƙasa.
“Ana sa ran wannan hulɗa za ta ƙara ƙarfafa ƙoƙarin Nijeriya na inganta tsaron ƙasa, bunƙasa haɗin kai tsakanin hukumomi, da ciyar da manufofin sabunta tsaron ƙasar gaba.
“Wannan ziyarar aiki wani ɓangare ne na faɗaɗa diflomasiyyar tsaro da shirye-shiryen hulɗar dabaru na Nijeriya da ke nufin inganta zaman lafiyar yankin, ingancin ayyuka, da juriyar ƙasa a cikin yanayin tsaro na duniya mai sauyawa.”
