Wata kotu a Amurka ta yanke wa wata farfesa ‘yar asalin Nijeriya mai suna Nkechy Ezeh hukuncin ɗaurin watanni 70 a gidan yari bisa laifin damfarar kuɗi har dala miliyan 1.4.
Kotun gundumar da ke Jihar Michigan ta ce Farfesa Ezeh, wadda ita ce tsohuwar babbar daraktar gudanarwa ta ƙungiyar Early Learning Neighbourhood Collaborative (ELNC), ta aikata laifin “shirya wata damfara da ta wawure dala miliyan 1.4 na kuɗin masu biyan haraji da na masu bayar da tallafi, waɗanda aka ware domin taimaka wa ƙananan yara masu rauni da ke makarantar gaba da firamare.”
Alƙalin kotun, Hala Jarbou, ta bayyana Ezeh a matsayin “’yar damfara kuma ɓarauniya” wadda ta aiwatar da wata “bayyananniya kuma babbar” maƙarƙashiyar satar kuɗaɗen da aka tanada domin “yaran da suka fi kowa rauni” a yankin Yammacin Michigan.
Ezeh, wadda farfesa ce mai koyar da ilimi, ita ce ta kafa ELNC, wata ƙungiya mai zaman kan ta wadda Ma’aikatar Lafiya ta Amurka, Ma’aikatar Ilimi, da masu bayar da tallafi masu zaman kan su suke ɗaukar nauyin ta domin samar da abinci, sufuri, tallafi, kare haƙƙi, da sauran ayyuka ga yara a al’ummomin da ba su da isassun ayyukan jinƙai.
A cewar wata sanarwa da gwamnatin Amurka ta fitar, alƙalin ta umurci Ezeh da ta biya dala miliyan 1.4 a matsayin diyyar mayar da asarar da waɗanda aka damfara suka yi, sannan ta biya dala 390,174 ga Hukumar Harajin Cikin Gida ta Amurka (IRS).
Har ila yau, alƙalin ta yanke mata hukuncin ɗaurin watanni 60, wanda za ta yi lokaci guda, saboda kauce wa biyan harajin kuɗin shiga.
A watan Disambar 2025, farfesar ta amsa laifukan damfarar hanyar sadarwa, haɗin baki wajen aikata laifi, da kauce wa biyan haraji.
Bisa ga yarjejeniyar amsa laifi, Ezeh ta amince cewa “tun daga aƙalla 2017 zuwa 2023, ta haɗa baki da Sharon Killebrew da wasu domin shirya wata maƙarƙashiyar damfarar ELNC da karɓar dala 1,400,000.”
Gwamnatin Amurka ta ce an rufe ELNC a 2023 sakamakon wannan damfara, lamarin da ya sa makarantu da dama na gaba da firamare a Yammacin Michigan suka rasa tallafi, yayin da yara mabuƙata suka rasa muhimman kayayyakin tallafi.
Ƙungiyar mai zaman kan ta ta kuma sallami ma’aikatan ta 35 ba tare da sanarwa ba.
Ita ma Sharon Killebrew, tsohuwar mai kula da lissafin ELNC kuma abokiyar aikata laifin Ezeh, an yanke mata hukuncin ɗaurin watanni 54 a gidan yari na tarayya a watan Nuwamban 2025 saboda rawar da ta taka a wannan maƙarƙashiya.
Da yake tsokaci kan hukuncin, Timothy VerHey, lauyan gwamnatin Amurka na yankin yammacin Michigan, ya ce Ezeh ta kashe kuɗaɗen tallafin da aka ware domin yara a kan ta maimakon taimaka musu.
“Kwaɗayin Nkechy Ezeh abin ƙyama ne matuƙa,” inji VerHey.
“Ta sace kuɗaɗen masu biyan haraji da na masu bayar da tallafi masu zaman kan su da aka ware domin yara marasa galihu a al’ummar mu. Maimakon taimaka wa yara, ta kashe kuɗin a kan ta.
“Da wannan kuɗin da aka sace, da an taimaka wa ɗaruruwan yara a Yammacin Michigan tare da iyalan su.
“Hukuncin da Alƙali Jarbou ta yanke ya dace ƙwarai.”
