Hukumar Yaƙi da Yi Wa Tattalin Arziki Ta’annati da Laifukan Kuɗi (EFCC) ta kama Darakta Janar na Hukumar Makamashi ta Nijeriya (Energy Commission of Nigeria, ECN), Dakta Mustapha Abdullahi, kan zargin aikata laifukan zambar kuɗaɗe da suka haura Naira biliyan 500.
An kama Abdullahi a Abuja ranar Laraba, kuma a halin yanzu yana tsare a hannun EFCC domin ci gaba da bincike.
Kamen ya biyo bayan wani ƙorafi da ƙungiyar sa ido mai suna Network Against Corruption and Drug Trafficking (NACAT) ta shigar a watan Disamba 2025, inda ta zargi Abdullahi da jagorantar “wani tsari mai kyau da kuma ƙarfin hali na aikata ba daidai ba” wanda ya haɗa da:
- Bai wa wasu kamfanoni biyar kwangilolin fitilun hasken rana na tituna ba bisa ƙa’ida ba, da kuɗin su ya kai ɗaruruwan miliyoyin naira, inda ake zargin mutum guda ne ke mallaka da tafiyar da su.
- An ce an yi wa dukkan kamfanonin rajista ne a cikin mako guda a ƙarshen Oktoba da farkon Nuwamba 2023.
- Ana zargin kamfanonin suna da adireshi iri ɗaya a Abuja da kuma daraktoci iri ɗaya.
- An take dokokin saye da bayar da kwangiloli na Nijeriya a fili yayin ba da kwangilolin.
Majiyar labari: The Cable
