Uwargidan Firayim Ministan ƙasar Faransa, Brigitte Macron, ta bayyana ƙudirin ta na kai hujja kotu mai tabbatar da cewa ita mace ce, ba ɗa namiji ba.
Hujjojin sun haɗa da hotuna da shaidun kimiyya.
Haka kuma ita da mijin ta sun shigar da ƙara a kotu a kan wata ‘yar taratsin soshiyal midiya mai suna Candace Owens bisa zargin ta da zaƙewa kan yayata wannan iƙirarin wanda ya yaɗu a duniya kamar wutar bazara.
Suka ce wannan wani kamfen ne da ake yin sa don a tsinka su a idon duniya.
Ita dai Candace Owens, mai shekaru 36, ta fi kowa yaɗa wannan magana cewa wai an haifi Brigitte ne a matsayin ɗa namiji, sai ta saci suna da bayanan wata mace domin ta yaudari jama’a tun daga lokacin.
Ta ce sunan namijin Jean-Michel Trogneux, to amma masu binciken lamarin sun gano cewa ai wannan ɗan’uwan Bridgette ɗin ne ciki ɗaya.
A watan Maris 2024, Owens ta rantse a manhajar X cewa ta amince da zubewar dukkan mutuncin ta idan an tabbatar da cewa Brigitte Macron ba namiji ba ce tun asali.
Ita ma ta yi ƙarar su Macron ɗin domin a yi watsi da ƙarar da suka kai ta.
Lauyan su Macron, Tom Clare, ya faɗa wa BBC kwanan nan cewa wannan ji-ta-ji-tar ta taɓa mutuncin Firayim Minista Emmanuel ɗan shekara 47, da matar sa Brigitte ‘yar shekara 72, kuma ma’auratan sun sha alwashin wanke kan su a kan wannan ƙage da aka yi masu
Ya ce: “A gaskiya abin damuwa ne matuƙa a ce sai mutum ya yi irin wannan abin, ya kawo irin wannan hujjar… Abu ne wanda tilas ta yi shi a bainar jama’a. Amma a shirye take ta yi hakan. Ta shirya tsaf domin ta yi abin da ya dace saboda ta kawar da duk wani shakku.”
Wata majiya ta ce daga cikin hujjojin da Bridgette za ta bayar a kotu har da hotunan da aka ɗauke ta tana da cikin ‘ya’yan ta da ta haifa.
