Gwamnatin Tarayya za ta ɗauki tsauraran matakai domin kawo ƙarshen shekaru na asara da sakaci bayan Ministan Yaɗa Labarai da Wayar da Kan Ƙasa, Alhaji Mohammed Idris, ya kai ziyarar duba Maɗaba’ar Gwamnati da aka daɗe da yin watsi da ita a Abuja, a yau Alhamis.
A yayin ziyarar, Ministan ya bayyana matuƙar damuwa game da halin da wurin yake ciki.
Ya bayyana cewa watsi da kamfanin ya jawo asarar biliyoyin naira, wanda abu ne da ba za a amince da shi ba, kuma ya saɓa wa sabon mayar da hankali da Gwamnatin Tarayya ke yi kan tanadi, ɗaukar mataki da kuma amfani da dukiyoyin jama’a yadda ya dace, a ƙarƙashin Manufar “Renewed Hope” ta Shugaba Bola Ahmed Tinubu.
Ministan ya tuna cewa an aza tubalin ginin cibiyar tun a shekarar 2001 a zamanin tsohon Shugaba Olusegun Obasanjo, inda ya bayyana cewa aikin ya kai kusan kashi 70 cikin 100 na kammalawa, tare da samar da manyan na’urorin ɗab’i tun a shekarar 2007.
Abin mamaki kuma, yawancin injinan da aka shigo da su daga ƙasashe irin su Jamus da Indiya har yanzu ba a buɗe su daga akwatunan su na asali ba fiye da shekara goma, inda wasu daga cikin fasahohin su ma suka zama tsofaffi sakamakon dogon sakaci.
Ya ce: “Abu ne mai taɓa zuciya ganin irin wannan asara a tsakiyar Abuja,” inji Ministan, yana mai cewa, “A daidai lokacin da gwamnati take ƙoƙarin tanadin albarkatu da dogaro da kai, abin ba zai yiwu ba a bar irin wannan babban jari ya lalace shekara da shekaru.”
Maɗaba’ar Gwamnati, wadda ke aikin bugun takardun Gwamnatin Tarayya, ita ce ke da alhakin gurza muhimman takardun ƙasa, ciki har da Jaridar Gwamnatin Tarayya (Federal Government Gazette) da sauran muhimman wallafe-wallafen Ma’aikatar Yaɗa Labarai da Wayar da Kai.
Ministan ya ce tsawon lokacin da maɗaba’ar ta tsaya ba tare da aiki ba ya tilasta gwamnati ta riƙa fitar da ayyukan ɗab’i zuwa waje, alhali ya kamata a yi su a cikin gida, lamarin da ke rage inganci da ƙarfin ƙasa.
Binciken ya kuma nuna cewa muhimman kayayyakin more rayuwa a wurin, ciki har da sabon janareta mai ƙarfin 2000 KVA da aka girka tun a shekarar 2011, bai taɓa aiki ba, wanda ke nuna yadda aka bar dukiyoyin jama’a ba a amfani da su.
Ministan ya samu rakiyar Babban Sakatare na Dindindin, Daraktan Riƙo da ke kula da sashen, da sauran manyan jami’an ma’aikatar.
Ministan ya bayyana cewa sun yi ziyarar ne domin shugabanni su ga halin da ake ciki da idon su, su yi cikakken nazari, sannan su yanke sahihan shawarwarin gudanarwa.
Ya ce: “Mun zo ne domin mu gani da idon mu. Za mu koma mu gabatar da shawarwari masu ma’ana ga Mai Girma Shugaban Ƙasa da Majalisar Zartarwa ta Tarayya kan mafi kyawun hanyoyin farfaɗo da wannan Maɗaba’ar Gwamnati tare da amfani da ita domin amfanin ‘yan Nijeriya.”
Ministan ya jaddada cewa Gwamnatin Tarayya ba za ta ci gaba da yin shiru kan lalacewar dukiyoyin ƙasa ba, inda ya tabbatar da cewa za a ɗauki matakai masu ƙarfi domin dawo da darajar jarin da aka riga aka zuba da kuma hana ƙarin asara.
Ya kuma sake jaddada ƙudirin Ma’aikatar Yaɗa Labarai da Wayar da Kai na gaskiya, kyakkyawan shugabanci da ingantaccen sarrafa albarkatun jama’a, bisa ga umurnin Shugaba Tinubu na cewa duk nairar da aka kashe dole ne ta haifar da wani amfani ga ‘yan Nijeriya.
