Jam’iyyar All Progressives Congress (APC) mai mulkin ƙasar nan ta bada sanarwar cewa Gwamnan Jihar Filato, Caleb Mutfwang, ya yi sauyin sheƙa daga jam’iyyar Peoples Democratic Party (PDP).
Shugaban APC na Ƙasa, Nentawe Yelwata, wanda shi ma ɗan Jihar Filato ne, shi ne ya bayyana sauyin sheƙar gwamnan a taron ƙolin jam’iyyar na ƙasa karo na 14 wanda aka gudanar a Zauren Taron Fadar Shugaban Ƙasa da ke Abuja.
Yelwata ya ce da sauyin sheƙar Gwamna Mutfwang, yanzu dukkan yankin Arewa ta Tsakiya yana ƙarƙashin mulkin APC.
An zaɓi gwamnan a ƙarƙashin PDP a babban zaɓen 2023, kuma ya zama sabon ɗan siyasar da ya shahara da ya fice daga babbar jam’iyyar adawa.
A wajen taron, shugaban APC ya bayar da wa’adin ranar 30 ga Janairu, 2026, ga dukkan membobin jam’iyyar domin su kammala rajistar zama memba ta hanyar intanet.
Ya ce fara aiki da tsarin rajistar intanet, wanda tuni aka soma, zai ƙara tsare gaskiya, ingancin bayanai da dimokiraɗiyyar cikin gida a jam’iyyar.
Ya ce: “Mun yi horo a matakin jiha, mun yi a matakin shiyya, mun kuma yi a ƙananan hukumomi a yawancin jihohi. Kuma ina kira ga masu ruwa da tsaki da su goyi bayan ƙaddamar da wannan muhimmin aiki a faɗin ƙasar nan.
“Mu yi amfani da wannan dama wajen tabbatar wa sababbin membobi cewa suna da dukkan haƙƙoƙi da gata a cikin jam’iyyar, mu kuma ƙarfafa masu gwiwa su yi amfani da rajistar membobi ta ƙasa domin su yi wa magoya bayan su rajista. Don haka tsofaffi da sababbin membobi su shiga shafin rajista su yi wa dukkan membobin su rajista.
“Muna sa ran a kammala wannan aiki daga yanzu zuwa ƙarshen Janairu, wato ranar 30 ga Janairu. Dole ne dukkan membobi su yi rajista tare da shirye-shiryen tunkarar tarukan jam’iyya (congresses) da ke tafe.”
Taron ya samu halartar Shugaban Ƙasa Bola Tinubu, Mataimakin Shugaban Ƙasa Kashim Shettima, manyan shugabannin Majalisar Dokoki ta Ƙasa, da tsohon Mataimakin Shugaban Ƙasa Yemi Osinbajo.
Haka kuma, gwamnonin APC da suka halarta sun haɗa da Peter Mbah na Inugu, Douye Diri na Bayelsa, Agbu Kefas na Taraba, da Umo Eno na Jihar Akwa Ibom, wanda kwanan nan ya koma APC, tare da tsofaffin gwamnonin jihohi, shugabannin jam’iyya na ƙasa, da sauran masu ruwa da tsaki na jam’iyyar.
