Mataimakin Shugaban Ƙasa, Kashim Shettima, ya gana da Sakatare-Janar na Majalisar Ɗinkin Duniya, António Guterres, a zauren majalisar da ke birnin New York, inda batun neman kujerar dindindin a kwamitin tsaro ya kasance kan gaba a tattaunawar.
Ganawar ta gudana ne bayan taron babban zauren majalisar karo na 80 (UNGA80), inda Shettima ya gabatar da jawabin ƙasa a madadin Shugaba Bola Tinubu.
Shettima ya jaddada buƙatar majalisar ta ƙara tallafa wa Nijeriya don cimma burin ta, musamman yadda ƙasar ke sha’awar samun kujerar dindindin a kwamitin tsaro.
Ministan Harkokin Waje, Yusuf Tuggar, ya shaida wa manema labarai cewa an tattauna kan cigaban da ake son samu wajen aiwatar da muradun cigaba masu ɗorewa (SDGs), batun sauyin yanayi, da kuma haɗin kai don ƙarfafa dimokiraɗiyya a Nijeriya da yankin Afrika.
Ya ce Guterres ya yaba da rawar da Shettima ya taka wajen jaddada buƙatar Nijeriya ta kujerar dindindin, tare da bayyana irin muhimmancin majalisar a Nijeriya, kasancewar dama ofisoshi da hukumomin majalisar da dama suna aiki a ƙasar.
Batun fasahar zamani da walwalar jama’a:
Ministan Sadarwa da Ƙirƙire-ƙirƙire, Bosun Tijani, ya bayyana cewa Guterres ya nuna farin ciki da nasarar Nijeriya wajen ƙaddamar da samfurin Ƙirƙirar Fasaha mai harsuna da dama (multilingual AI model) na farko a nahiyar Afrika, wanda gwamnati ta tallafa.
A cewar sa, Guterres ya buƙaci Nijeriya ta taimaka wa sauran ƙasashen Afrika don kada a bar nahiyar baya a fannin na’urorin Ƙirƙirarriyar Fasaha.
A nasa ɓangaren, Ministan Walwala, Jinƙai da Rage Talauci, Yusuf Sununu, ya ce Shettima ya bayyana ƙoƙarin gwamnatin Tinubu wajen rage talauci da tallafa wa jama’a.
Ya ce gwamnati na da jadawalin al’umma da ta ƙunshi gidaje miliyan 18.9, inda aka riga aka tallafa wa sama da mutane miliyan 8.1 ta hanyar shirin bayar da kuɗin tallafi.
Sununu ya ce an kuma bayyana damuwa kan raguwar tallafin kuɗi daga wasu ƙungiyoyin Majalisar Ɗinkin Duniya, ciki har da shirin WFP wanda ya tallafa wa sama da mutane miliyan 1.3 da kayan abinci.
Tabbacin goyon bayan Majalisa:
Sakataren-Janar na Majalisar Ɗinkin Duniya ya tabbatar wa Nijeriya cewa za ta ci gaba da samun goyon baya wajen ƙara ƙarfin ma’aikatun gwamnati, tabbatar da sahihancin bayanan al’umma, da kuma samun karin tallafi don rage talauci da inganta jin dadin jama’a.
A cewar sa, Guterres ya gode wa Shugaba Bola Tinubu da gwamnatin Najeriya baki ɗaya kan irin haɗin kai da suke bai wa majalisar.
