Gwamnan Jihar Neja, Alhaji Mohammed Umaru Bago, yana miƙa makullin ɗaya daga cikin motocin ga Shugaban Hukumar Gudanarwar Jami’ar Abdulƙadir Kure, Minna (AKUM, Farfesa Mohammed Kuta Yahaya, yau a Abuja
Gwamnan Jihar Neja, Alhaji Mohammed Umaru Bago, ya raba motocin aiki ga jami’an gudanarwar Jami’ar Abdulƙadir Kure, Minna (AKUM) domin inganta gudanar da ayyukan su da sauƙaƙa zirga-zirgar su.
Da yake jawabi yayin bikin miƙa motocin a Abuja, gwamnan ya bayyana cewa samar da motocin wani ɓangare ne na ƙoƙarin gwamnatin sa na ƙarfafa harkokin ilimi da samar da ingantaccen yanayin aiki ga shugabannin cibiyoyin ilimi.
Ya ce motocin za su taimaka wajen sauƙaƙa ayyukan jami’an gudanarwar jami’ar tare da ƙara masu ƙwarin gwiwar gudanar da nauyin da aka ɗora masu yadda ya kamata.
Gwamnan ya jaddada cewa gwamnatin sa tana ci gaba da ba fannin ilimi fifiko, yana mai cewa jin daɗin malamai da sauran ma’aikatan jami’o’i yana daga cikin muhimman abubuwan da gwamnatin sa ta mayar da hankali a kai.
Ya taya jami’an gudanarwar jami’ar murnar samun motocin, tare da ƙarfafa masu gwiwar su ci gaba da yin aiki tuƙuru domin ɗaga darajar jami’ar.
Haka kuma ya yi nuni da muhimmancin haɗin gwiwa tsakanin cibiyoyin ilimi, musamman ganin akwai Jami’ar Ibrahim Badamasi Babangida da ke Lapai da sabuwar Jami’ar Noma da Sauyin Yanayi ta Abdulsalami Abubakar da aka amince da kafawa a Mokwa.
A nasa jawabin, Shugaban Hukumar Gudanarwar Jami’ar Abdulƙadir Kure, Farfesa Mohammed Kuta Yahaya, ya yaba wa Gwamna Bago bisa wannan tallafi, yana mai cewa hakan ya nuna jajircewar gwamnatin jihar wajen bunƙasa ilimi.
Ya ce tallafin da gwamnan ke bai wa jami’ar ya taimaka wajen ƙara yawan masu neman gurbin karatu a makarantar, tare da inganta martabar ta a idon jama’a.
Yahaya ya ƙara da cewa a yanzu Jami’ar Abdulƙadir Kure tana daga cikin jami’o’in jihohi da suka fi jan hankalin ɗalibai a Nijeriya.
Ya bayyana cewa burin Gwamna Bago na faɗaɗa damar samun ingantaccen ilimi na ci gaba da zama gaskiya, yana mai cewa gudunmawar da gwamnan yake bayarwa wajen bunƙasa jarin ɗan’adam abin koyi ne ga sauran masu ruwa da tsaki.
