Ariwera Jonathan, ɗan tsohon Shugaban Ƙasa, Dakta Goodluck Ebele Jonathan, ya yi bikin kammala karatun sa a Jami’ar Manchester Metropolitan da ke Birtaniya.
An gudanar da bikin yaye ɗaliban ne a yau Alhamis, inda tsohon shugaban ƙasar da matar sa, Patience Jonathan, suka halarta tare da sauran ‘yan’uwa da abokan arziki domin taya shi murnar wannan gagarumar nasara.
Da yake bayyana labarin wannan nasara a wani saƙo da ya wallafa a shafin sa na Facebook, mai magana da yawun Jonathan, Mista Ikechukwu Eze, ya taya Ariwera murna, yana mai cewa nasarar da ya samu ta samo asali ne daga ƙwazo da jajircewa ba tare da gajiyawa ba.
Ariwera Jonathan tare da iyayen sa da abokan arziki a lokacin bikin yaye ɗaliban
A cewar Eze, Ariwera ya yi fice a tsawon rayuwar sa ta karatu, inda ya nuna abin yabawa na mayar da hankali kan karatu, tawali’u da kuma ladabi.
Hotunan da aka ɗauka a wajen bikin sun nuna tsohon Shugaban Ƙasa da matar sa suna murnar kammala karatun ɗan nasu tare da shi bayan kammala taron.
