Babban Bankin Nijeriya (CBN) ya bayyana cewa yana ƙaddamar da sababbin ƙa’idoji masu tsauri ga kamfanonin fintech da masu samar da ayyukan biyan kuɗi ta hanyar dijital domin tabbatar da adalci da gasa mai inganci a fannin harkokin kuɗi.
Da yake jawabi a Taron Business Journal Fintech and Financial Inclusion na shekarar 2026 karo na uku da aka gudanar a Legas, Gwamnan CBN, Olayemi Cardoso, ya ce ba za a bari wata cibiyar kuɗi ta mamaye kasuwa ta yadda hakan zai hana gasa ko kuma ya cutar da masu amfani da ayyukan hadahadar kuɗi ba.
Cardoso, wanda Daraktar Sashen Kula da Tsarin Biyan Kuɗi na CBN, Dakta Rakiya Opemi Yusuf ta wakilta a taron, ya ce manufar CBN ita ce samar da yanayin da bankuna, kamfanonin fintech da sauran masu samar da ayyukan biyan kuɗi za su yi gasa cikin adalci ƙarƙashin ƙa’idoji bayyanannu tare da kare haƙƙin kwastomomi.
Ya bayyana cewa, duk da cewa ƙirƙire-ƙirƙire na da muhimmanci wajen faɗaɗa shigar jama’a cikin harkokin kuɗi da inganta tsarin biyan kuɗi, bai kamata a yi amfani da shi wajen samun rinjaye na rashin adalci ba.
A cewar Cardoso, CBN ya samar da sabbin ƙa’idojin tsarin kasuwa da nufin rage mamayar da wasu ke yi a fannin ayyukan biyan kuɗi, musamman a ɓangaren fitar da kayan biyan kuɗi ga masu amfani da kuma karɓar kuɗin ‘yan kasuwa.
Ya ce waɗannan matakan za su hana kowace hukuma amfani da ƙarfinta a wani ɓangare na kasuwa domin ta mallaki ko ta rinjayi wani ɓangare cikin rashin adalci.
Cardoso ya jaddada cewa sabuwar manufar ba ta da nufin hana kasuwanci bunƙasa, sai dai tabbatar da cewa ci gaban kasuwanci ba zai rage gasa, zaɓin kwastomomi ko kuma ya kawo barazana ga zaman lafiya da daidaito ga tsarin kuɗin Nijeriya ba.
Haka kuma ya sanar da cewa CBN zai ƙara tabbatar da gaskiya ta hanyar wajabta wa cibiyoyin kuɗi bayyana ainihin waɗanda suka mallake su, domin hana ɓoyayyen tsarin mallaka da kuma rikice-rikicen da ka iya biyo baya.
Daga nan sai ya ce daga yanzu dukkan bayanan mu’amalolin biyan kuɗi da ake samarwa a Nijeriya dole ne a adana su kuma a sarrafa su a cikin Nijeriya.
Ya ce hakan zai ƙarfafa tsaron bayanai, inganta sa-ido na hukumomin kula da harkokin kuɗi, tare da rage dogaro da tsarin adana bayanai na ƙasashen waje.
Cardoso ya ƙara da cewa CBN zai ci gaba da inganta yanayin gudanar da harkokin kuɗi ta hanyar bai wa sabbin masu gudanar da ayyukan hadahada lasisi, tallafa wa hanyoyin biyan kuɗi na dijital, da kuma haɗin gwiwa da bankuna, kamfanonin fintech da sauran masu ruwa da tsaki domin faɗaɗa shigar jama’a cikin harkokin kuɗi.
Ya jaddada cewa tilas ƙa’idoji su ƙarfafa ƙirƙire-ƙirƙire tare da tabbatar da cewa duk cibiyoyin da ke kula da kuɗin jama’a, sarrafa biyan kuɗi ko adana bayanan kwastomomi suna gudanar da ayyukan su cikin gaskiya.
Daga ƙarshe, Cardoso ya ce CBN zai ci gaba da amfani da ƙa’idoji iri ɗaya ga dukkan cibiyoyin da ke fuskantar irin wannan haɗari, ba tare da la’akari da girman su, tsarin mallakar su ko fasahar da suke amfani da ita ba.
Sai dai ya ce cibiyoyin da ke da babban tasiri a kasuwa za a buƙaci su bi ƙa’idojin shugabanci da bin dokoki masu tsauri fiye da sauran.
