Gwamnan Babban Bankin Nijeriya (CBN) Mista Olayemi Cardoso, ya bayyana yadda sauye-sauyen da aka aiwatar a fannin sarrafa kasuwar musayar kuɗaɗen waje, manufofin kuɗi da kuma tabbatar da ƙarfafa tsarin kuɗi suka fara inganta yanayin tattalin arzikin Nijeriya.
Cardoso ya yi bayanin ne filla-filla a Taron Shugabannin Kamfanoni na 2026, wanda jaridar BusinessDay ta shirya.
Muhimman abubuwan da ya bayyana sun haɗa da:
Jimillar adadin ajiyar kuɗaɗen waje na Nijeriya, wanda yanzu ya ƙaru zuwa dala biliyan 52.
“Haka kuma, adadin ajiyar kuɗaɗen waje na ainihi ya kai kusan dala biliyan 40, lamarin da ya ƙara ƙarfafa matsayin tattalin arzikin Nijeriya da kuma amincewar masu zuba jari.”
CBN na ci gaba da ƙudirin cimma burin samun dala biliyan 1 a kowane wata daga kuɗaɗen da ‘yan Nijeriya mazauna ƙasashen waje ke aikowa gida nan da ƙarshen shekarar 2026.
Ya kuma ce kasuwar musayar kuɗaɗen waje ta samu isasshen kuɗi, har ta kai ga ba ta buƙatar yawan tsoma bakin CBN.
Shirin ƙara ƙarfi da yawan jarin bankuna ya haifar da ƙaruwar samun sabon jari da ya kai kusan Naira tiriliyan 4.65, lamarin da ya ƙara ƙarfafa tsarin bankunan Nijeriya ta hanyar ingantaccen sa-ido da ƙa’idoji.
Amincewar jama’a da tsarin biyan kuɗi na Nijeriya ta ƙaru sosai, inda yanzu ‘yan Nijeriya ke iya amfani da katin cire kuɗi na banki cikin sauƙi wajen gudanar da mu’amaloli a ƙasashen waje.
Yayin da hauhawar farashi ke raguwa, kuma ribar ruwa ke fara sauƙaƙa a hankali, CBN na sa ran bankuna za su ƙara bayar da rance ga sassan da ke samar da ci gaba, musamman ƙanana da matsakaitan masana’antu (SMEs), tare da ci gaba da kiyaye ƙa’idojin gudanar da haɗarin bashi.
“CBN zai ci gaba da aiki kafaɗa da kafaɗa da cibiyoyin kuɗi domin ƙara ƙarfafa ƙarfin su tare da daidaita tsarin bankunan Nijeriya da ƙa’idojin da ake bi a duniya,” cewar Cardoso.
Da yake jawabi ga shugabannin kamfanoni, Cardoso ya buƙace su da su yi amfani da damar da ingantuwar yanayin tattalin arzikin ƙasar ke samarwa, maimakon ci gaba da zama masu kallo.
“A matakin da muka kai yanzu, mun samu kwanciyar hankali ne bayan ƙoƙari mai yawa. Idan akwai kwanciyar hankali, akwai damar zuba jari, kuma idan aka samu zuba jari, ci gaba zai biyo baya. Don haka ina kira ga dukkan shugabannin kamfanonin mu na cikin gida da su kasance cikin wannan tafiya ta ci gaba da ƙasar nan ke yi”, inji Cardoso.
