Ƙungiyar Malaman Jami’o’i (ASUU) ta bayyana cewa za ta fara yajin aiki na mako biyu daga gobe Litinin saboda kasa cika alƙawarin da gwamnati ta yi mata.
Shugaban ƙungiyar, Farfesa Chris Piwuna, shi ne ya bayyana hakan a wani taron manema labarai a yau a Abuja.
Piwuna ya ce an yanke shawarar hakan ne bayan gazawar da Gwamnatin Tarayya ta yi na biya wa ƙungiyar buƙatun ta bayan ƙarewar wa’adin kwana 14 da ta gindaya.
A cewar sa, manufar wa’adin da ƙungiyar ta bayar a ranar 28 ga Satumba ita ce a ba gwamnati lokaci ta warware matsalolin da suka daɗe ana tataɓurza a kan su duk da zaman tattaunawa da aka sha yi.
Ya ce: “Waɗannan matsalolin sun haɗa da kammala yarjejeniyar Gwamnatin Tarayya da ASUU ta 2009 da biyan albashin watanni uku da rabi da gwamnati ta riƙe.
“Sauran su ne farfaɗo da tare da ci gaba da ɗaukar nauyin jami’o’in gwamnati, biyan sauran kashi 25 cikin ɗari na bashin albashi da aka biyo, da kuma bashin ƙarin girma na tsawon shekaru huɗu.”
Ya ƙara da cewa a kuma biya kuɗin da aka zabtare na wasu ayyukan musamman da malamai suka yi sannan a daina musguna wa malaman jami’o’in Legas (LASU), KSU, da FUTO a matsayin matsalolin da ba a warware ba.
Piwuna ya bayyana matsayin da gwamnati ta ɗauka kan waɗannan al’amurra da cewa jan faɗa ne da tsokana kurum.
Ya ce: “Takardun da wakilan gwamnati suka kawo wajen zaman tattaunawa sun yi hannun riga da shawarwarin da kwamitin da Alhaji Yayale Ahmed ya jagoranta ya gabatar a baya.”
Saboda haka ya yi kira ga ɗalibai da iyaye da dukkan ‘yan Nijeriya da su fahimci halin da ake ciki, yana mai cewa an ɗauki wannan mataki ne domin a tilasta wa gwamnati ta inganta tare da sauya fasalin tsarin ilimi na ƙasar nan.
Ya ce: “Da wannan muke bada umurni ga dukkan rassan ƙungiyar ASUU da su janye daga ayyukan su daga sha-biyun Daren Litinin, 13 ga Oktoba.
“Wannan yajin aiki na gargaɗi za a yi shi gama-gari kuma cikakke.”
