Shugaba Bola Ahmed Tinubu ya dawo Abuja yau bayan shafe kwanaki 10 na ziyarar aiki a Jihar Legas.
Shugaban ya je Legas a ranar Juma’a, 26 ga Satumba, bayan halartar bikin nadin sabon Olubadan na Ibadan, Mai Martaba Oba Rashidi Adewolu Ladoja.
A yayin da yake Lagos, Shugaban Ƙasa ya gana da manyan ’yan kasuwa da masu zuba jari, ciki har da shugaban kamfanin Global Infrastructure Partners, Bayo Ogunlesi, da tsohon shugaban UBA da Etisalat, Akeem Belo-Osagie, wanda yanzu ke shugabantar Metis Capital Partners.
Shugaba Tinubu ya kuma karɓi baƙuncin Sakatare-Janar na Hukumar Kula da Harkokin Ruwa ta Duniya (IMO), Mista Arsenio Dominguez, tare da Ministan Harkokin Ruwa da Tattalin Arzikin Ruwa, Adegboyega Oyetola, da shugabannin hukumomin da ke ƙarƙashin ma’aikatar.
A yayin tattaunawar, Shugaban Ƙasa ya sake jaddada ƙudirin gwamnatin sa na inganta harkokin ruwa a matsayin hanyar dena dogaro da man fetur.
A daren bikin cikar Nijeriya shekaru 65 da samun ’yancin kai, Shugaban Ƙasa ya ziyarci Jihar Imo, inda ya ƙaddamar da wasu ayyukan da Gwamna Hope Uzodimma ya aiwatar.
Haka kuma ya halarci taron kaddamar da littafin da Gwamnan ya rubuta kan tarihin shekaru 10 na mulkin jam’iyyar APC a Nijeriya.
A ranar bikin ’yancin kai, Shugaban Ƙasa ya gabatar da jawabin ƙasa kai tsaye daga fadar gwamnati ta Dodan Barracks.
Daga bisani kuma, ya ƙaddamar da sabunta Gidan wasa na ƙasa (National Theatre), wanda yanzu aka sake masa suna zuwa Cibiyar Al’adu da Fasaha ta Wole Soyinka (Wole Soyinka Centre for Culture and the Creative Arts), inda ya yi kira ga ’yan ƙasa da su riƙa yin fata mai kyau game da Nijeriya.
A ranar Asabar, 4 ga Oktoba, Shugaban Ƙasa ya ziyarci garin Jos, Jihar Filato, domin halartar jana’izar mahaifiyar Farfesa Nantawe Yilwatda, Shugaban APC na ƙasa.
A wajen jana’izar, Shugaba Tinubu ya yaba da rayuwa da jajircewar marigayiya Mama Lydia Yilwatda, tare da tabbatar wa al’ummomin Kiristoci na Arewa cewa gwamnatin sa za ta ci gaba da tabbatar da adalci da daidaito tsakanin mabiya mabambantan addinai a faɗin ƙasar nam.
