Aƙalla jiragen tankar mai 150, ciki har da jiragen ɗaukar ɗanyen mai da iskar gas mai ruwa (LNG), sun yi fakin a Tekun Fasha bayan mashigar tekun Strait of Hormuz, yayin da wasu da dama kuma suka tsaya a ɗaya gefen wannan mahaɗar, kamar yadda bayanan jigilar ruwa suka nuna a ranar Lahadi, bayan hare-haren da Amurka da Isra’ila suka kai wa Iran suka jefa yankin cikin rikici.
Jiragen tankar sun taru a buɗaɗɗen ruwa kusa da gaɓar manyan ƙasashen da ke samar da mai a yankin Tekun Fasha, ciki har da Iraƙi da Saudiyya, da kuma ƙasar Ƙatar wadda ta yi fice wajen fitar da iskar gas mai ruwa (LNG), a cewar ƙididdigar kamfanin dillancin labarai na Reuters bisa bayanan bin diddigin jirage daga dandalin MarineTraffic.
Yawancin jiragen sun tsaya ne a cikin yankunan tattalin arziki na musamman (EEZ) na manyan ƙasashen Tekun Fasha, ciki har da Kuwaiti da Haɗaɗɗiyar Daular Larabawa (UAE), kamar yadda bayanan MarineTraffic suka nuna.
EEZ na iya kaiwa har mil 24 a teku, baya ga iyakar ruwan ƙasa na mil 12 na kowace ƙasa.
Haka kuma, bayanan sun nuna cewa ɗaruruwan jiragen dakon kaya sun taru a sassa daban-daban na waɗannan yankunan EEZ.
Kimanin kashi 20% na man fetur na duniya — ciki har da na Saudiyya, Haɗaɗɗiyar Daular Larabawa, Iraƙi, Kuwaiti da Iran — suna ratsawa ta mashigar Strait of Hormuz, tare da manyan adadin iskar gas mai ruwa daga Ƙatar.
Bugu da ƙari, aƙalla wasu jiragen tankar 100 sun tsaya cak a wajen mashigar, a gaɓar UAE da Oman da wuraren tsayawar jirage, tare da wasu jiragen dakon kaya da dama, a cewar bayanan.
Wasu masu jiragen tankar, manyan kamfanonin mai da gidajen kasuwanci sun dakatar da jigilar ɗanyen mai, man fetur da LNG ta mashigar Strait of Hormuz bayan hare-haren, yayin da Iran ta ce ta rufe zirga-zirgar ruwa, kamar yadda majiyoyin kasuwanci suka shaida a ranar Asabar.
“Har zuwa yanzu, babu wata sanarwar dakatar da zirga-zirga ta hukuma (ta mashigar) da hukumomin ruwa da aka amince da su a duniya suka fitar,” inji Cibiyar Bayanan Harkokin Ruwa ta Haɗin Gwiwa ƙarƙashin jagorancin Rundunar Sojin Ruwa ta Amurka a wata sanarwa a ranar Asabar.
“Masu tafiyar da jiragen ruwa su yi tsammanin ƙarin yawan sojojin ruwa, ƙarfafa matakan tsaro, yiwuwar kiran VHF, cunkoso a wuraren fakin a wajen mashigar, da kuma tangal-tangal a kasuwar inshora.”
