Legas ta haskaka ƙarƙashin hasken rana na Idin Sallah. Birnin da ba ya barci ya ɗan dakata na ɗan lokaci domin girmama wannan lokaci mai tsarki na biki. Amma a wajen wani mutum ɗaya, murnar Sallah ba ta cika ba sai da ya kai ziyara ga wanda yake ɗauka a matsayin shugaba kuma jagora.
Yana sanye da cikakkiyar shigar Jagaban — wato farar babbar riga mai yalwar gaske da aka yi wa ado da zare mai kalar zinari, tare da hula mai kama da ita a kan sa — Bello Mohammed Matawalle ya shiga ɗakin tarbar baƙi cikin natsuwa da girmamawa. Ba kawai maganar tufafi ba ce. Saƙo ne. Alamar girmamawa ce ga tarihin shugabanci, jagoranci da sadaukarwar da yake ɗauke da su a zuciyar sa.
“Ban taɓa ganin mutum mai irin wannan jajircewa kamar Matawalle ba,” wani mataimaki ya faɗa a hankali yayin da kyamarori suke ɗaukar hotuna. A daidai wannan lokacin, ba musabaha kaɗai hoton ya ɗauka ba. Ya kama shekaru na zaman amana, hidima da cikakkiyar imani da hangen nesa guda ɗaya domin Nijeriya.
A yayin da yake tsaye a gefen Mai Girma Shugaban Ƙasa, Bola Ahmed Tinubu, GCFR, yanayin Matawalle ya nuna girmamawa, yayin da murmushin sa ya bayyana farin ciki na gaske. Daga gefen kuma akwai Uwargidan Shugaban Ƙasa, wadda ta kasance shaida ga alaƙar da ke tsakanin waɗannan manyan ‘yan siyasa daga Arewa da Yamma, waɗanda manufar su iri ɗaya ce.
Ga Matawalle, wannan ba wata al’adar aiki ce kawai ba. Abu ne na zuciya.
A wannan zamani na siyasa da ake yawan gwada aminci da buri na buƙatar rai, Matawalle ya zaɓi ya zo. Ba domin a ɗauke shi hoto ba, ba domin fitowa a kanun labarai ba, sai dai saboda a gare shi, aminci ba na wani lokaci ne kawai ba. Manufa ce ta rayuwa.
“Shugabanci yana nufin tsayawa tare da shugaban ka a lokacin da hanya take da sauƙi da kuma lokacin da take da ƙalubale,” inji shi daga baya, bayan ya bar gaban kyamarori. “Shugaba Tinubu ya ba ni damar yi wa ƙasa hidima a matakin ƙasa baki ɗaya. Mafi ƙarancin abin da zan iya yi shi ne in tsaya tare da shi, in kare shi, kuma in yi aiki domin irin Nijeriyar da yake da muradin samu.
“Shugaba Tinubu ya ba ni damar yi wa ƙasa hidima a matakin ƙasa baki ɗaya. Mafi ƙarancin abin da zan iya yi shi ne in tsaya tare da shi, in kare shi, kuma in yi aiki domin irin Nijeriyar da yake da muradin samu.”
Ziyarar ta kasance taƙaitacciya, to amma saƙon da ta ƙunsa yana da ƙarfi: ba a auna jajircewa da kalaman fatar baki kaɗai, ana auna ta ne da kasancewa a wurin da ya dace. Da nuna goyon baya. Da girmama ofishi, mutum shugaba da kuma amanar da jama’a suka ba shi.
Yayin da Matawalle ya fita da yammacin Legas, yana dai sanye da kayan Jagaban, abu ɗaya ya bayyana a sarari — aminci idan na gaskiya ne, ba ya ɓuya. Kuma a tafiyar Nijeriya zuwa gaba, irin wannan amincin ba kawai abu ne mai wuya a samu ba. Abu ne da ake matuƙar buƙata.
* Mista James Hope marubuci ne kuma mai sharhi kan al’amuran yau da kullum, kana babban mai goyon bayan Matawalle da Tinubu
