Sarkin Musulmi, Alhaji Muhammadu Sa’ad Abubakar III, ya yi gargaɗin cewa ƙaruwar rashin haƙurin addini, kalaman ƙiyayya, yaɗa labaran ƙarya da kuma taɓarɓarewar ɗabi’u suna barazana ga haɗin kan Nijeriya da zaman lafiya tsakanin al’umma.
Sarkin Musulmin ya bayyana hakan ne a Abuja yayin da yake karɓar baƙuncin wakilin Paparoma, Achibishop Paul Richard Gallagher, tare da tawagar sa, a wani taro da aka shirya domin ƙarfafa haɗin gwiwa tsakanin shugabannin Musulmi da Kiristoci wajen samar da zaman lafiya da bunƙasa ƙasa.
Sarkin Musulmin, wanda Mataimakin Babban Sakataren Majalisar Ƙoli ta Harkokin Addinin Musulunci ta Nijeriya (NSCIA), Farfesa Salisu Shehu, ya wakilta, ya jaddada muhimmancin ƙara tattaunawa, fahimtar juna da haɗin gwiwa tsakanin mabiya addinan biyu domin magance matsalar tsaro da sauran ƙalubalen da ƙasar ke fuskanta.
Ya bayyana cewa kalaman ƙiyayya suna ci gaba da haifar da rashin amincewa tsakanin mabiya addinai tare da ƙara rarrabuwar kawuna, yayin da yaɗa labaran ƙarya ke ƙara tayar da hankali da haddasa rikice-rikicen da za a iya kauce wa.
Sarkin Musulmin ya kuma yi Allah-wadai da yadda ake cin mutuncin manyan shugabannin addinai, inda ya buƙaci ‘yan Nijeriya da su riƙa mutunta juna ba tare da la’akari da bambancin addini ko ƙabila ba.
Haka kuma ya nuna damuwar sa kan abin da ya bayyana a matsayin taɓarɓarewar ɗabi’u da kuma ƙin bin koyarwar addinai da ake samu a tsakanin matasa, yana mai kira da a ƙara ba da muhimmanci ga tarbiyyar ɗabi’a da ilimin addini.
Da yake magana bayan taron, Achibishop Gallagher ya bayyana tattaunawar da aka yi da cewa “ta kasance mai gaskiya kuma mai faɗakarwa,” yana mai cewa shugabannin Musulmi da Kiristoci suna da ƙimomi da nauyin da suka yi tarayya a kai wajen inganta zaman lafiya, jituwa tsakanin addinai da cigaban al’umma.
Ya bayyana fatan cewa ci gaba da tattaunawa da haɗin gwiwa tsakanin addinai zai ƙara ƙarfafa haɗin kan ƙasa tare da samar da ɗorewar zaman lafiya da kwanciyar hankali a Nijeriya.
