Gwamnatin Amurka ta hana fitaccen alƙalin wasa ɗin nan (rafari) ɗan ƙasar Somaliya, Omar Abdulkadir Artan, damar halartar Gasar Kofin Duniya bayan da ta hana shi shiga ƙasar ta.
Ba tare da ambaton sunan sa ba, Hukumar Kwastam da Kula da Iyakokin Amurka (CBP) ta tabbatar a ranar Litinin cewa an hana wani ɗan ƙasar Somaliya da aka shirya zai yi alƙalanci a gasar shiga ƙasar saboda wata damuwa da ta taso yayin tantance bayanan sa.
Daga baya a ranar Litinin, Hukumar Ƙwallon Ƙafa ta Duniya (FIFA) ta tabbatar da cewa Artan ba zai samu damar halartar horo ko gudanar da wasanni a Gasar Kofin Duniya ɗin ba.
A cikin wata sanarwa, FIFA ta ce ba ta da hannu a harkokin shige da fice, kuma hukumomin da abin ya shafa sun sanar da ita cewa matsayin Artan “ba zai canza a halin yanzu ba.”
FIFA ta ƙara da cewa, “Kamar yadda aka saba a sauran manyan gasa na FIFA, gwamnatin ƙasar mai masaukin baƙi ce ke da ikon yanke hukunci kan wanda za a ba biza da kuma wanda za a bari ya shiga ƙasar ta.”
An ruwaito cewa Artan, wanda aka zaɓa a matsayin mafi kyawun alƙalin wasa a Afrika a bara, yana da ingantacciyar bizar shiga Amurka duk da cewa Somaliya tana cikin jerin ƙasashen da ke ƙarƙashin dokar taƙaita shiga Amurka.
Jami’an Somaliya sun soki matakin, suna cewa hakan “na raunana ƙudirin ƙwallon ƙafa na tabbatar da adalci, cancanta da ruhin wasa cikin gaskiya.”
FIFA ta sake tabbatar da labarin tare da jaddada cewa ba ta da hannu a tsarin shige da fice.
Haka kuma, an hana wasu ma’aikatan tallafin tawagar ƙasar Iran shiga Amurka, yayin da ɗan wasan gaba na Iraƙi, Ayman Hussein, ya shafe sa’o’i da dama a filin jirgin saman Chikago kafin daga bisani a ba shi izinin shiga ƙasar.
A cikin wata sanarwa, Artan ya gode wa “iyalan ƙwallon ƙafa” saboda saƙonnin goyon baya da suka aika masa, kuma ya yi wa abokan aikin sa fatan samun nasara a Gasar Kofin Duniya.
“Duk da abin da ya faru, ina cikin kyakkyawan yanayi kuma ina mai da hankali kan ƙalubalen da ke gaba a harkar alƙalanci ta,” inji Artan. “Ina gode wa FIFA da Hukumar Ƙwallon Ƙafa ta Afrika saboda dukkan goyon bayan da suka ba ni, kuma na yi alƙawarin ci gaba da inganta matakin alƙalanci na yayin da nake mayar da hankali kan makoma.”
Gasar Kofin Duniya ta bana dai za ta gudana ne a ƙasashen Amurka, Meziko da Kanada. Za a fara gasar ne a ranar Alhamis a Birnin Meziko.
