Jam’iyyar African Democratic Congress (ADC) ta roƙi Babbar Alƙaliyar Nijeriya (CJN), Mai Shari’a Kudirat Kekere-Ekun, da a gaggauta fitar da hukunci kan rikicin shugabancin jam’iyyar a matakin ƙasa.
Ɓangaren ADC na David Mark ne ya yi wannan roƙo a cikin wata wasiƙa da babban lauyan su kuma Babban Lauyan Nijeriya (SAN), Shu’aibu Aruwa, ya sanya wa hannu.
Wasiƙar mai ɗauke da kwanan wata 28 ga Afrilu, an karɓe ta a ofishin CJN.
Sun yi roƙon cewa jam’iyyar ba za ta iya taka rawa a babban zaɓen 2027 ba sai an fitar da hukuncin cikin kwanaki uku daga yau.
Jam’iyyar ta ce za ta fuskanci mummunar illa da ba za a iya gyarawa ba idan har Kotun Ƙoli ba ta yanke hukunci a wannan doguwar taƙaddama ba a wa’adin da Dokar Zaɓe ta tanada domin tsayar da ‘yan takara a zaɓen 2027.
Kamfanin Dillancin Labarai na Nijeriya (NAN) ya ruwaito cewa Kotun Ƙoli ta ajiye yanke hukunci kan rikicin ADC tun ranar 22 ga Afrilu, zuwa ranar da za a sanar da ɓangarorin da ke taƙaddamar.
Kwamitin alƙalai biyar na Kotun Ƙoli, ƙarƙashin jagorancin Mai Shari’a Lawal Garba, shi ne ya jingine hukuncin bayan lauyoyin ɓangarorin sun gabatar da hujjojin su na goyon baya da adawa da ƙarar.
Sai dai saboda fargabar ƙarin jinkiri wajen fitar da hukuncin, jam’iyyar ta nuna matuƙar damuwa cewa ba za ta iya shiga zaɓen gama-gari mai zuwa ba.
Ta ce ikon ADC na cika dukkan sharuɗɗan doka domin shiga zaɓen 2027 ya ta’allaƙa ne kacokam kan gaggauta fitar da hukunci a wannan ƙara.
Ta jaddada cewa idan ba a fitar da hukuncin cikin kwanaki uku masu zuwa daga ranar wasiƙar ba, ADC za ta fuskanci babban haɗari marar gyaruwa na a cire ta daga shiga babban zaɓen na 2027.
Ta ce hakan zai hana miliyoyin ‘yan Nijeriya da suka rungumi manufofin ADC haƙƙin su da kundin tsarin mulki ya ba su na yin tarayya da kuma tsayawa takara ta jam’iyyar siyasa da suka zaɓa.
Jam’iyyar ta tunatar da CJN cewa jinkirta adalci, a wannan yanayi na musamman, tamkar hana adalci ne. Makomar siyasar abokin hulɗar mu da kuma halastattun tsammanin membobin ta a faɗin ƙasa yanzu suna rataye ne a mizani, inji ta.
