Matakin da Babban Bankin Nijeriya (CBN) ya ɗauka na nufin rage zamba, ƙarfafa kariyar bayanan mutum, da kuma kare tsarin kuɗi na Nijeriya.
Yayin da CBN ke shirin fara aiwatar da sabbin dokokin ‘Bank Verification Number’ (BVN) daga ranar 1 ga Mayu, 2026, akwai muhimman ƙa’idoji da kowane mai asusun banki ya kamata ya sani kafin wa’adin ya cika.
Sabon tsarin ya kawo tsauraran dokoki kan canjin lambar waya, amfani da na’ura, da iyakar adadin ma’amaloli.
Matakin na nufin rage zamba, ƙarfafa kariyar shaidar mutum, da kuma kare tsarin kuɗi a ƙasa.
Manhajar Banki ta Wayar Salula (Mobile Banking App):
Daga yanzu, za a taƙaita amfani da manhajar banki a kan waya guda ɗaya kawai a lokaci guda.
Idan ka shiga manhajar bankin ka a wata sabuwar waya, tsohuwar na’urar za ta daina aiki nan take, sannan a buƙaci ƙarin matakan tabbatar da kai.
Ƙarfafa Sa-ido kan Zamba:
An umurci bankuna su sanya duk wata lambar BVN da aka danganta da ayyukan da ake zargi na zamba cikin jerin lambobin da ake sa-ido kan su na awanni 24. A wannan lokacin, ana iya taƙaitawa ko kulle asusun da abin ya shafa, yayin da banki zai tuntuɓi mai asusun don tabbatarwa.
Canjin Lambar Waya:
A ƙarƙashin sabuwar doka za a iya canza lambar wayar da ke da alaƙa da BVN sau ɗaya kacal a rayuwa.
Wannan mataki na nufin daƙile yawaitar zambar sauya kati wato ‘SIM-swap’, inda masu laifi ke karɓe lambar waya domin samun damar shiga asusun banki.
Saboda haka ana bada shawara ga kwastomomi su haɗa BVN ɗin su da lambar waya mai ƙarfin tsaro kuma ta dindindin — musamman wadda ke da alaƙa da lambar shaidar ɗan ƙasa ta NIN (National Identification Number).
Mafi Karancin Shekarun Yin Rijistar BVN:
CBN ya gindaya shekaru 18 a matsayin mafi ƙarancin shekaru don yin rijistar BVN.
Wannan yana nufin yara ƙanana ba za su iya mallakar BVN da kan su ba. Maimakon haka, iyaye ko masu kula za su yi amfani da tsare-tsaren banki na yara domin sarrafa kuɗaɗen su.
Adadin Yawan Ma’amala Da Banki:
Duk wanda ya kunna manhajar banki a sabuwar waya zai fuskanci adadin iyakar ma’amala ta ₦20,000 cikin awanni 24 na farko.
Wannan mataki kariya ce domin rage asara idan aka samu matsala yayin saita wayar.
Abin da Ya Kamata Ka Yi Kafin 1 ga Mayu, 2026:
Ana ƙara jaddada wa kwastomomi su ɗauki matakan kariya domin guje wa tangarɗa.
Tabbatar da lambar wayar da ke haɗe da BVN ɗin ka: Ta kasance mai aiki, mai tsaro, kuma taka ce dindindin.
Sabunta bayanai da wuri: Idan kana buƙatar canza lambar waya, yi hakan kafin wa’adin ya cika.
Tsauraran matakan shiga (login):
Musamman idan kana sauya waya ko sake girka manhajar banki.
A ƙarƙashin sabuwar doka, dole ne cibiyoyin kuɗi su kafa kuma su kula da sa-ido na wucin gadi ga BVN da ake zargi da alaƙa da ma’amaloli masu hatsari a cikin tsarin banki.
