Wani sabon rikicin shugabanci ya dabaibaye jam’iyyar adawa ta African Democratic Congress (ADC), yayin da shugabannin ta na dukkan jihohi 36 da Babban Birnin Tarayya suka shigar da ƙara a kotu kan Kwamitin Gudanarwa na Ƙasa (NWC) bisa zargin take dokokin kundin tsarin mulkin jam’iyyar.
Rahotanni sun nuna cewa rikicin ya samo asali ne daga wasu matakai da NWC ɗin, wanda ke ƙarƙashin jagorancin Sanata David Mark, ya ɗauka, musamman kafa kwamitoci domin kula da zaɓen fidda gwani na jihohi da aka shirya gudanarwa a watan Afrilu.
Kwamitocin Gudanarwa na Jihohi da abin ya shafa sun zargi shugabannin jam’iyyar na ƙasa da kutsawa cikin ayyukan da kundin tsarin mulki ya tanadar musu, ta hanyar kafa tsare-tsare kai-tsaye don gudanar da zaɓen fidda gwani, suna mai jaddada cewa irin waɗannan ayyuka na hannun kwamitocin zartarwa na jihohi ne kaɗai bisa dokokin jam’iyyar.
A cikin takardar ƙarar da suka shigar a Babbar Kotun Tarayya da ke Abuja, masu ƙarar suna neman kotu da ta shiga tsakani domin dakatar da shirye-shiryen zaɓen fidda gwanin.
Suna kuma neman umurnin wucin gadi (interlocutory injunction) da zai hana NWC ci gaba da aiwatar da shirin har sai an yanke hukunci kan ƙarar.
Ƙarar ta kuma taso da tambayoyi kan halascin kwamitin riƙon ƙwarya ko na wucin gadi da NWC ya kafa, musamman ko yana da hurumin shirya zaɓen fidda gwani na jihohi.
Haka kuma, masu ƙarar sun ƙalubalanci sahihancin naɗa kwamitocin taro ba tare da bin tanade-tanaden kundin tsarin mulkin jam’iyyar ba.
Wani muhimmin batu da ke gaban kotun shi ne wa’adin mulkin kwamitocin zartarwa na jihohi na yanzu. Masu ƙarar sun ce wa’adin su na shekaru huɗu yana nan daram har sai an gudanar da zaɓuɓɓukan taron jihohi da babban taron ƙasa bisa ƙa’idojin kundin tsarin mulki.
An shigar da ƙarar ne ta hannun Don Norma Obinna da wasu mutum shida a madadin shugabannin jihohin.
Waɗanda ake ƙara sun haɗa da ADC, da shugaban NWC David Mark, da Hukumar Zaɓe Mai Zaman Kan ta ta Ƙasa (INEC), da sauran ɓangarori masu ruwa da tsaki.
Daga cikin buƙatun da ake nema akwai umurnin da zai hana tsoma baki cikin ayyuka da wa’adin shugabannin jihohi, tare da ayyana naɗin membobin kwamitin taro da NWC na rikon ƙwarya ko na wucin gadi ya yi a matsayin mara inganci.
