Shugaban Ƙasa Bola Ahmed Tinubu ya sanya hannu kan dokar kafa Cibiyoyin Horas da ‘Yan Sanda, wadda aka amince da ita a shekarar 2024 domin bai wa cibiyoyin horaswa na ‘yan sanda doka da cikakken tsarin aiki.
Dokar ta bada sahalewar kafa cibiyoyi 48 na horaswa a faɗin ƙasar nan tare da gina tsarin koyarwa, bincike da horaswa da zai tabbatar da ingantaccen aiki da bin ƙa’idodin duniya a harkar tsaro.
An kafa dokar ne bisa ƙudirin Sanata Ahmed Malam-Madori (na jam’iyyar APC mai wakiltar Jigawa Arewa Maso Gabas), wanda ya bayyana cewa manufar ita ce inganta ilimi, ƙwarewa da gogewar aikin ‘yan sanda.
Dokar ta tanadi nau’o’in cibiyoyi guda biyar da suka haɗa da Kwalejojin ‘Yan Sanda, Makarantun Horaswa, Makarantun Dabarun Aiki, Makarantun Fasaha, da Cibiyoyi na Musamman.
Wasu daga cikin fitattun cibiyoyin da dokar ta amince da su sun haɗa da KWalejin ‘Yan Sanda ta Ikeja, Kaduna, Maiduguri, Jos, Oji River, da Kwalejin bincike ta Inugu.
Haka kuma dokar ta amince da cibiyoyin horaswa a Bauchi, Minna, Sokoto, Benin, Kalaba, Ilorin, Ibadan, Jos, da wasu wurare don faɗaɗa horaswa a matakin ƙasa.
A ƙarƙashin dokar, Makarantun Dabarun Aiki za su rika koyar da dabaru na musamman ga rukunin “Mobile Police” da “Counter-Terrorism Unit”, inda aka amince da makarantun a Gwoza, Ila-Orangun, Ende-Hill, Nonwa-Tai, da Gombe. Haka nan akwai makarantun a Kafin Hausa, K9 School a Bukuru, da Mounted Troop School a Jos.
Sanata Malam-Madori ya bayyana amincewar Shugaban Ƙasa da dokar a matsayin mataki mai girma da zai sauya tsarin tsaro a ƙasar nan.
