Sufeto-Janar na ’Yan Sanda, IGP Kayode Adeolu Egbetokun, ya naɗa SP Orvenonne Ikwen a matsayin sabuwar Kodinetar Yaƙi da ’Yan Daba da Sauran Ayyukan Ɓatagari ta Ƙasa (POCACOV).
Jami’in Hulɗa da Jama’a na Rundunar ’Yan Sanda a Hedikwatar ’Yan Sanda, Abuja, CSP Benjamin Hundeyin, ya bayyana naɗin da cewa wani muhimmin shiri ne na rundunar ’yan sanda ta Nijeriya da aka ƙirƙira domin inganta hanyoyin sulhu da ba na tashin hankali ba wajen yaƙar matsalar ƙungiyoyin ’yan daba da sauran miyagun ɗabi’u a cikin al’umma.
Ya ce: “Wannan naɗi ya yi daidai da ƙudirin IGP na samar da aikin ’yan sanda na zamani, wanda ke dogara da bayanan sirri, fasaha, da kuma mayar da jama’a a tsakiyar aikin tsaron ƙasa, tare da fifita rigakafin laifi, amincewar jama’a, da ƙarfafa haɗin kai tsakanin ’yan sanda da al’umma.”
Ita dai SP Ikwen, wadda ƙwararriyar jami’ar ’yan sanda ce, gogaggiya a harkokin tsaro da cigaban al’umma, ƙwararriya ce a fannin dabarun sadarwa.
Hundeyin ya ce ta zo da ƙwarewa mai zurfi ta aiki da ilimi a wannan sabon matsayi.
Tana da digirin digirgir (Ph.D.) a fannin Kimiyyar Kwamfuta, ta musamman a Artificial Intelligence da Data Science daga Jami’ar Kalaba.
Ta yi fice wajen gudunmawar da ta bayar a fannin aikin ’yan sanda mai dogaro da fasaha, hulɗa da jama’a, da sadarwar canjin halayya.
Memba ce a Institute of Strategic Management of Nigeria (ISMN) da Institute of Conflict Management & Negotiation Analyst (ICMNA).
Ta taka muhimmiyar rawa a ayyukan sauya fasalin rundunar ’yan sanda, bincike, da ayyukan haɗin gwiwa tsakanin hukumomi.
Ya ƙara da cewa, “A matsayin ta na Kodineta ta Ƙasa, ana sa ran SP Ikwen za ta faɗaɗa kuma zurfafa ayyukan POCACOV a cikin jami’o’i, makarantun sakandare, al’ummomi, da ƙungiyoyin matasa wajen magance matsalolin ’yan daba, shaye-shaye, barazanar yanar gizo, cin zarafin jinsi, yaɗa bayanan ƙarya, da sauran munanan ɗabi’u ta hanyoyi na rigakafi, haɗin kai, da dabarun da ke mayar da al’umma a gaba.
“Sufeto-Janar na ’Yan Sanda ya yi kira ga SP Ikwen da ta yi amfani da sababbin dabaru na rigakafin laifi, tare da haɗa kai da ɓangarori daban-daban — shugabannin al’umma, makarantu, ƙungiyoyin matasa, da abokan haɗin gwiwa da suka daɗe suna goyon bayan wannan shiri.”
