Shugaban Ƙasa, Bola Tinubu, a ranar Lahadi ya karɓi Kwamandan Rundunar Sojin Amurka a Afrika (USAFRICOM), Janar Dagvin Anderson, tare da tawagar sa a Fadar Shugaban Ƙasa da ke Abuja.
Kamfanin Dillancin Labarai na Najeriya (NAN) ya ruwaito cewa taron ya samu halartar Mai Bai wa Shugaban Ƙasa Shawara kan Harkokin Tsaro (NSA), Malam Nuhu Ribaɗu, da shugabannin hukumomin tsaro.
Haka kuma, Muƙaddashin Jakaden Amurka a Nijeriya, Mista Keith Heffern, ya halarci taron.
Tattaunawar ta mayar da hankali kan ƙarfafa alaƙar Nijeriya da Amurka, musamman a fannin haɗin gwiwar tsaro da zaman lafiyar yankin.
Har ila yau, an duba ƙoƙarin da ake yi a halin yanzu domin tunkarar ƙalubalen tsaro da ƙasashen biyu ke fuskanta a faɗin Afrika.
Daga hagu: Darakta-Janar na Hukumar Leƙen Asiri ta Ƙasa (NIA), Mohammed Mohammed; Darakta-Janar na Hukumar Tsaro ta Farin Kaya (DSS), Tosin Ajayi; Command Sergeant Manjo Garric M. Banfield, Babban Jagoran Sojojin da Ba Su da Muƙamin Hafsa, Rundunar Sojojin Amurka a Afrika (AFRICOM); Babban Mai Ba da Shawara kan Manufofin Harkokin Waje na AFRICOM, Ambasada Peter Vrooman; Muƙaddashin Jakaden Amurka a Nijeriya, Keith Heffern; Kwamandan AFRICOM, Janar Dagvin Anderson; Shugaba Bola Tinubu; Mai Ba Shugaban Ƙasa Shawara kan Tsaro, Nuhu Ribaɗu; Ministan Tsaro, Janar Christopher Musa (ritaya); Babban Hafsan Tsaron Ƙasa, Janar Olufemi Oluyede; Babban Hafsan Sojin Ƙasa, Laftanar Janar Waidi Shaibu; da Babban Hafsan Leken Asirin Tsaro, Laftanar Janar Emmanuel Uandiandeye.
