Aƙalla mutane 42 ne aka kashe, yayin da aka sace wasu da dama—har da yara ’yan makaranta—biyo bayan jerin hare-haren ’yan bindiga da aka kai wa al’ummomi a ƙananan hukumomin Agwara da Borgu na Jihar Neja.
Mazauna yankin sun ce hare-haren, da suka ɗauki sama da mako guda suna gudana, sun faru ne ba tare da wani gagarumin turjiya ba sakamakon rashin jami’an tsaro a wuraren da abin ya shafa.
A cewar majiyar, “Sun ɗaure hannayen mutane 37 a baya sannan suka yanka su a Kasuwar Daji kusa da Papiri, yayin da aka kashe wasu biyar a ƙauyen Kaima.
“Sun kuma sace mutane da dama, ciki har da yara, wasu daga cikin su ɗalibai ne na Makarantun Katolika masu zaman kan su na Firamare da Sakandaren St. Mary’s da ke Papiri, a Ƙaramar Hukumar Agwara.
“Gwamnati da hukumomin tsaro su zo su taimake mu. Muna fuskantar babbar matsala a can bayan kogi inda aka tafi da waɗannan ɗalibai,” inji majiyar.
Mazauna yankin sun ƙara da bayyana cewa an banka wa kasuwar gari wuta a ranar Asabar, an kwashe kayayyaki daga shaguna tare da satar kayan abinci, sannan aka sake sace ƙarin mutanen ƙauyuka, ciki har da yara.
Da yake tabbatar da harin da aka kai wa ofishin mishan na Katolika, Daraktan Sadarwa na Diocese na Katolika na Kontagora, Rev. Father Stephen Kabirat, ya ce maharan sun kuma lalata kadarorin coci yayin harin.
“Faston mu na cocin yankin ya tsallake rijiya da baya daga sacewa, lokacin da maharan suka zo gidan mishan kwanaki uku da suka wuce,” inji Kabirat.
Ya ce: “Sun lalata wasu sassan coci, sun tafi da babura guda biyu da kuɗi sama da ₦200,000, sannan suka sace wasu mazauna gari, ciki har da yara.”
Wani mazaunin yankin da ya roƙi hukumomi da su ɗauki matakin gaggawa, ya ce tsoro ya tilasta wa al’ummomi barin muhallan su.
“Yanzu haka, mutanen wasu daga cikin ƙauyukan da aka sace yaran makaranta daga cikin su suna kwana a daji bayan sun koma gida, saboda tsoron sake kai musu hari,” inji mazaunin.
A halin da ake ciki, Rundunar ’Yan Sanda ta Jihar Neja ta tabbatar da hare-haren. A cikin wata sanarwa, Kakakin Rundunar ’Yan Sanda, SP Wasiu Abiodun, ya ce rundunar ta samu rahoton mamayar ’yan bindiga makisa a daren Asabar.
“Da misalin ƙarfe 9:00 na dare, ’yan sanda sun samu bayani cewa wasu da ake zargin ’yan bindiga ne sun kai hari kan al’ummomi a Ƙaramar Hukumar Borgu, inda suka kashe sama da mutane 30 tare da sace wasu da ba a tabbatar da adadin su ba,” inji sanarwar.
Abiodun ya bayyana cewa tun da misalin ƙarfe 4:30 na yamma a ranar, ’yan bindigar da ake zargin sun fito daga Dajin National Park na yankin Kabe, sun kai hari Kasuwar Daji a ƙauyen Demo, inda suka kashe jama’a, suka ƙona kasuwa, tare da kwashe kayayyaki daga shaguna.
Ya ƙara da cewa rundunar haɗin gwiwar jami’an tsaro ta kai ziyara wuraren da abin ya shafa, kuma ana ci gaba da ƙoƙarin ceto waɗanda aka sace tare da dawo da zaman lafiya.
“Za a ba da sanarwar ƙarin bayani idan an samu,” inji kakakin ’yan sanda.
