Kamfanin BUA Foods Plc ya naɗa Alhaji Isyaku Abdulsamad Rabi’u (wanda aka fi sani da sunan Khalifa) a matsayin babban jami’i mai kula da saye-da-sayarwa na duniya da ayyukan dabaru.
Kamfanin ya yi haka ne domin ƙarfafa sahun shugabannin sa yayin da yake sake fasalin samar da kayayyaki tare da neman bunƙasa cikin ingantaccen tsari mai rahusa.
Kamfanin ya ce naɗin Khalifa ya fara aiki ne daga ranar 29 ga Janairu, 2026.
Matashin ɗan kasuwar zai jagoranci dukkan harkokin saye-da-sayarwa na duniya daga farko har ƙarshe na kamfanin, tare da jagorantar shirye-shiryen inganta ayyuka domin ƙara ƙwarewa, rage farashi da kuma ƙarfafa juriya a wajen samar da kayayyaki a dukkan fannoni na kamfanin.
Wannan mataki ya zo ne yayin da BUA Foods ke sauyawa daga matakin daidaitawa zuwa abin da ya bayyana a matsayin bunƙasa mai tsari da faɗaɗa aiki a manyan sassan kayan abincin sa, ciki har da fulawa, taliyar makaroni, shinkafa da abincin dabbobi.
Khalifa dai ya fito ne daga uwar rukunin kamfanonin, wato BUA Group, inda ya riƙe muƙamin darakta mai kula da ayyuka na musamman, kuma ya jagoranci shirye-shiryen sauyi da dama a ɓangarorin abinci, siminti da abincin dabbobi.
Kamfanin ya ce aikin sa ya haɗa da ƙarfafa alaƙa da masu samar da kayayyaki, inganta tsarin saye-da-sayarwa da kuma haɓaka ingancin ayyuka.
A cewar kamfanin, Khalifa ya taka muhimmiyar rawa wajen tsara sayen albarkatun ƙasa, musamman alkama, tare da jagorantar kafa wata masana’antar sarrafa abincin dabbobi mai ƙarfin samar da tan 40 a cikin awa guda kacal.
Bugu da ƙari, ya kuma shiga cikin sake dawo da kayayyakin shinkafar BUA a kasuwar masu amfani ta Nijeriya, tare da kula da ƙaddamar da dandamali na dijital mallakar kamfanin a dukkan ayyukan BUA Foods.
Manajan Daraktan BUA Foods, Ayodele Abioye, ya faɗa a cikin wata sanarwa a yau cewa: “Yayin da BUA Foods ke shiga sabon matakin sauyi, wanda ke nuna sauyawa daga daidaita kasuwanci zuwa bunƙasa mai tsari da faɗaɗa aiki, muna farin cikin maraba da Khalifa cikin tawagar shugabannin mu.
“Ƙwarewar sa a fannin saye-da-sayarwa ta duniya da ayyukan dabaru za ta taimaka sosai wajen ƙarfafa tsarin samar da kayayyakin mu da kuma haɓaka ingancin ayyuka.”
A wani nazari da ta yi kan labarin, jaridar BusinessDay ta yi la’akari da cewa gudanar da tsarin samar da kayayyaki ya zama muhimmin abu ga masana’antun abinci a Nijeriya, waɗanda suka fuskanci tashin-tashinar kasuwar canjin kuɗaɗen waje, hauhawar farashin kayan masarufi da matsalolin sufuri a cikin shekaru biyu da suka gabata.
Ta ce kamfanoni suna ƙoƙarin tabbatar da wadatattun albarkatun ƙasa da kuma inganta tsarin saye-da-sayarwa domin kare ribar su da daidaita samarwa.
A nasa ɓangaren, Khalifa ya ce yana shirin haɓaka tsarin saye-da-sayarwa mai sassauci da ɗorewa domin tallafa wa burin kamfanin na dogon lokaci.
Ya ce: “Ina matuƙar farin ciki da karɓar wannan muƙami a wannan muhimmin lokaci na tafiyar bunƙasar BUA Foods.
“Ina fatan jagorantar dabarun saye-da-sayarwa da ayyuka da za su tallafa wa manufofin kamfanin na dogon lokaci.”
Khalifa Rabi’u yana da digirin farko a fannin hulɗar ƙasashe daga Jami’ar Regent’s da ke London, da digiri na biyu a fannin gudanarwa daga Makarantar Kasuwanci ta McDonough da ke Jami’ar Georgetown a Amurka.
Kamfanin BUA Foods, mallakin attajiri Abdul Samad Rabi’u, ya faɗaɗa ayyukan sa cikin sauri a ‘yan shekarun nan, inda ya zuba jari a cikin samar da kayayyaki a cikin gida da kuma faɗaɗa ƙarfin masana’antu domin rage dogaro da shigo da kaya daga waje da kuma inganta sarrafa farashi.
Wannan naɗin na Khalifa ya nuna sabon ƙudirin mayar da hankali kan aiwatarwa da bin ƙa’idojin gudanarwa yayin da kamfanin yake shirin shiga sabon matakin bunƙasa.
