AN yi kira ga iyaye da su tashi tsaye wajen koyar da yaran su tare da nuna musu muhimmancin karatu da rubutu a harshen Hausa domin su tashi da kyawawan halaye da al’adu na iyaye da kakanni.
Wannan kiran ya fito ne daga bakin Shugabar Ƙaramar Hukumar Tudun Wada da ke Jihar Kano, Hajiya Sa’adatu Salisu Yusha’u Soja, a lokacin da take jawabi a taron ƙaddamar da littattafan ‘Abokiyar Zama’ da ‘Lokaci’, waɗanda Hajiya Mariya Inuwa Durumin Iya ta rubuta, a shekaranjiya Asabar a ɗakin taro na Mahmoud Tukur da ke tsohuwar Jami’ar Bayero da ke Kano.
Hajiya Sa’adatu ta ce: “A wannan lokaci da aka samu gurɓatar al’amuran rayuwa, yana da matukar muhimmanci a ɗora yara masu tasowa a hanyar nuna musu muhimmancin karatu da rubutu domin su tashi da halaye nagari kamar yadda muka gada a wajen iyayen mu.
“Abu ne mai muhimmancin gaske a cusa al’adu, don ta haka ne za a samu yara na gaba masu tarbiyya da kuma kishin kan su.”
Ta ci gaba da cewa, “Ni na tashi a ƙauye, don haka ni rayuwar ƙauye na yi, kuma ni a karatu na ba siyasa na karanta ba, amma a yanzu na samu kai na a cikin siyasa a matsayin Shugabar Ƙaramar Hukuma, don haka a yanzu ina ganin matsaloli da dama, musamman ta fuskar zamantakewar aure da kuma rayuwar yara mata kafin a yi musu aure.
“Wannan ya sa a yanzu na duƙufa wajen rubuta littafi duk da ba ni da wadataccen lokaci, amma na kan yi rubutun na tura shi ga malami na yana dubawa tare da gyara mini ta yadda nan gaba idan ya kammala za a buga shi domin amfanin jama’a.
“Kuma na ji daɗi da nake samun damar yin rubutun domin fito da wasu matsalolin da suke damun mu ta fuskar zamantakewar rayuwa, musamman mata wanda nake tunanin zai amfani jama’a idan littafin ya fito, ina fatan samun ƙwarin gwiwa daga gare ku domin ganin wannan littafin ya kammala, domin aiki ne na jama’a gaba ɗaya, ba nawa ni kaɗai ba.”
A ɓangaren marubuta kuwa, kira ta yi ga marubuta da su tashi tsaye wajen bincike domin gano matsalolin da suke damun al’umma domin yin rubutu a kan su, don a wayar da kan matasa abin da ya kamata su yi mai kyau da kuma abin da ya kamata su nesanta domin rashin kayan sa.
“Ina ƙarfafa wa matasa, musamman mata, su dage da karatu da rubutu har ya zama ɗabi’ar su ta yadda za su yaƙi jahilci da munana ɗabi’u.”
