Rukunin Bankin Duniya ya yi maraba da cigaban gyare-gyaren da Nijeriya take yi tare da yaba wa Gwamnatin Tarayya kan fayyace manufar ta, yana mai cewa ana samun ƙaruwar amincewa daga kasuwannin duniya da abokan hulɗa na ƙasa da ƙasa.
Hakan ya bayyana ne daga wani taro da aka gudanar a wannan makon a Abuja tsakanin Ministan Kuɗi da Daidaita Tattalin Arziki, Mista Wale Edun, da Manajan Daraktar Ayyuka ta Rukunin Bankin Duniya, Misis Anna Bjerde, tare da manyan jami’ai.
Tattaunawar ta mayar da hankali kan faɗaɗa samar da ingantacciyar wutar lantarki, ƙarfafa harkar noma, hanzarta bunƙasa kayayyakin more rayuwa na dijital, inganta zirga-zirgar kasuwanci, da kuma buɗe ƙofofin zuba jari daga ɓangaren ‘yan kasuwa — waɗanda dukkan su muhimmai ne wajen gina tattalin arziki mai ƙarfi da gasa.
Misis Bjerde ta sake jaddada goyon bayan Bankin Duniya ga ajandar bunƙasa tattalin arzikin Nijeriya ta hanyar zuba jari, tare da mai da hankali kan aiwatar da ayyukan more rayuwa da kuma sa hannun ɓangaren ‘yan kasuwa.
A jawabin sa, Mista Edun ya bayyana cewa ana samun gagarumin cigaba a muhimman fannoni, sakamakon tsare-tsaren manufofi masu ƙarfi da kuma sabunta mayar da hankali kan bunƙasa tattalin arziki, jawo jari, da samar da ayyukan yi.
Ya kuma sake tabbatar da jagorancin Nijeriya a gyaran fannin makamashi da burin ta na zama cibiyar tattalin arziki ta yankin, tare da goyon bayan rawar da Nijeriya take takawa a matsayin ta na hedikwatar Ƙungiyar Tattalin Arzikin Ƙasashen Yammacin Afrika (ECOWAS).
Ɓangarorin biyu sun amince kan hanzarta aiwatar da shirye-shirye, jawo manyan jarin kuɗi, da samar da dama ga yawan al’ummar Nijeriya da ke ƙaruwa.
Daraktan Yaɗa Labarai da Hulɗa da Jama’a na Ma’aikatar Kuɗi ta Tarayya, Malam Mohammed Manga, ya bayyana a cikin wata sanarwa cewa taron ya sake tabbatar da sahihiyar alƙiblar tattalin arziki ta Shugaba Bola Ahmed Tinubu da kuma ƙaruwar amincewar duniya da shirin gyare-gyaren ƙasar nan yake samu.
“Wannan muhimmin mataki yana nuna jajircewar Nijeriya wajen samun bunƙasar tattalin arziki mai ɗorewa tare da sanya ƙasar a sahun gaba a kasuwannin yankuna da na duniya,” inji shi.
