Wata Babbar Kotun Tarayya da ke Abuja ta yanke wa Nnamdi Kanu, jagoran ƙungiyar da aka haramta ta Indigenous People of Biafra (IPOB), hukuncin ɗaurin rai-da-rai.
Alƙali James Omotosho ne ya yanke hukuncin bayan ya same shi da laifi a dukkan tuhume-tuhumen ta’addanci guda bakwai da ake masa.
Haka kuma, ya yanke masa ɗaurin shekaru 20 a kan tuhuma ta Uku da kuma shekaru biyar a kan tuhuma ta Bakwai, ba tare da zaɓin biyan tara ba.
Ya ce hukuncin zai gudana a lokaci guda.
Yayin yanke hukunci, ya ce: “Ina bada sanarwar yanke wa wanda aka yanke wa hukunci ɗaurin rai-da-rai a kan tuhume-tuhume na 1, 4, 5, da 6 maimakon hukuncin kisa.
“Game da tuhuma ta Uku, an yanke masa ɗaurin shekaru 20 ba tare da zaɓin tara ba.
“A kan tuhuma ta Bakwai, an yanke masa hukuncin ɗaurin shekaru biyar ba tare da zaɓin tara ba. Domin miƙa sassauci, ina bada umurnin cewa dukkan hukuncin za su gudana a lokaci guda.”
