Hakeem Baba-Ahmed, tsohon mai ba wa Mataimakin Shugaban Ƙasa shawara kan harkokin siyasa, ya ce jam’iyyar African Democratic Congress (ADC) na iya fuskantar rugujewar cikin gida idan har Atiku Abubakar ya fito a matsayin ɗan takarar shugaban ƙasa na jam’iyyar a zaɓen 2027.
Baba-Ahmed ya bayyana hakan ne a ranar Talata yayin wata hira a shirin Politics Today da ake watsawa a tashar talbijin ta Channels.
Ya ce Atiku yana da kyakkyawan matsayi na samun tikitin ADC idan jam’iyyar ta gudanar da babban taron ta na ƙasa.
“Idan ADC ta je taron ƙasa, kuma tabbas za ta je domin shi ne abin da tsohon Mataimakin Shugaban Ƙasa Atiku ke so, zai samu tikitin,” inji Baba-Ahmed.
“Sannan mutane da yawa za su fice, domin mutane da dama da ke cikin jam’iyyar suna can ne saboda abu ɗaya—su ma suna son tikitin.”
Ya ce a halin yanzu ADC na ɗauke da manyan ’yan siyasa masu suna, kuma burikan su za su yi karo da juna yayin zaɓen ɗan takara.
Baba-Ahmed ya ƙara da cewa daidaiton cikin jam’iyyar na iya ƙara yin rauni sakamakon muradin Peter Obi, tsohon gwamnan Jihar Anambra.
“Ɗaya daga cikin dalilan da Peter Obi ke cewa, ‘Ku dubi ni, ba na nan don lamba biyu, ba na nan don taron ƙasa, na zo ne don ɗaga tutar jam’iyya,’ shi ne yana da mutane da tun farko suna yi masa maganganu a hankali,” inji shi.
“Amma yanzu suna cewa, ‘Ka shiga layi. Ba kai kaɗai ne ke da buri a nan ba.’”
Tsohon mai ba da shawarar siyasar ya ce Obi ya fi sabawa da a zaɓe shi ta hanyar yarjejeniya (consensus) fiye da shiga zaɓen fidda gwani mai tsauri.
“Peter Obi ba ya yin taron ƙasa. Kawai yana zuwa ne a naɗa shi,” inji shi.
“Don haka, ADC za ta yi asarar membobi bayan taron ta na ƙasa, domin kusan tabbas tsohon Mataimakin Shugaban Ƙasa Atiku ne zai lashe tikitin, kuma idan hakan ta faru, wasu za su fice, jam’iyyar kuma za ta lalace ƙwarai.”
