Bankunan Nijeriya 21 sun cika sababbin ƙa’idojin mafi ƙanƙantar jarin da Babban Bankin Nijeriya (CBN) ya gindaya, yayin da ɓangaren bankuna ke hanzarta bin shirin sake ƙarfafa jari da aka fara a 2024.
Wannan shiri na da nufin ƙara ƙarfin bankuna wajen jure girgizar tattalin arziki da kuma ba su damar ba da gudunmawa mai ma’ana ga bunƙasar tattalin arzikin ƙasa.
Sabbin ƙa’idojin sun tanadi Naira biliyan 500 ga bankunan kasuwanci masu lasisin ƙasa da ƙasa, naira biliyan 200 ga bankunan masu lasin kasuwanci a faɗin ƙasar nan, da naira biliyan 50 ga bankunan cikin yankuna da shiyya.
Ga bankunan da ke aiki hadahada bisa tsarin da babu kuɗin ruwa, an sa naira biliyan 20 mafi ƙanƙantar jarin su. Sai Naira biliyan 10 ƙa’idar bankunan yanki.
An ba bankuna wa’adin watanni 24 domin cika wannan sharaɗi, wanda zai ƙare a ranar 31 ga Maris, 2026. Wannan ya haifar da yawaitar fitar da hannun jari, tattaunawar haɗewar bankuna, da sake tsara ma’aunin kuɗaɗe.
Wannan shiri ya yi kama da na shekarar 2004 a lokacin tsohon gwamnan CBN, Charles Soludo, wanda ya tilasta bankuna su ƙara jarin su daga naira biliyan 2 zuwa naira biliyan 25. Wannan mataki ya rage adadin bankuna daga 89 zuwa 25, tare da samar da manyan bankuna masu ƙarfi a lokacin.
Zuwa 8 ga Janairu, bankuna 21 sun riga sun cika sabbin ƙa’idojin, inda Access Bank ya zama bankin farko da ya kai matakin naira biliyan 500.
Bankunan da Suka Cika Sabbin Ƙa’idojin Jarin CBN
Bankunan Kasuwanci Masu Lasisin Ƙasa da Ƙasa (₦500bn):
- Access Bank – Jarin sa ya kai naira biliyan 602.8.
- Zenith Bank – Jarin sa ya kai naira biliyan 614.
- First HoldCo (First Bank) – Ya cika sharaɗin CBN ta hanyar sayar da wani reshen kasuwanci.
- GTCO (GTBank) – Sama da Naira biliyan 504 bayan shirye-shiryen tara jari a matakai daban-daban.
- United Bank for Africa (UBA) – Ya ya zarce Naira biliyan 500 bayan tara jari a 2024 da 2025.
- Fidelity Bank – Jarin sa ya kai naira biliyan 564.5.
Bankuna Masu Lasin Cikin Ƙasa:
(naira biliyan)
- Wema Bank – Ya kammala tara naira biliyan 150; yana jiran tabbatarwar ƙarshe daga CBN
- Citibank Nigeria – Ya cika sharadin (ba a bayyana yadda aka tara jari ba)
- Standard Chartered Bank Nigeria ( Shi wannan banki ya samu taimakon jari daga babbar cibiyar kamfanin a Birtaniya)
- Ecobank Nigeria – Ya wuce matakin Naira biliyan 200.
- Globus Bank – Ya haura naira biliyan 200, bayan tara jari a 2024–2025.
- Stanbic IBTC – Ya tara naira biliyan 200.
- PremiumTrust Bank – Ya wuce wuce naira biliyan 200.
- Providus Bank – Ya cika sharaɗin ta hanyar haɗewa da Unity Bank.
Bankunan Merchant:
- FSDH Merchant Bank,
- Greenwich Merchant Bank,
- Nova Bank da
- Rand Merchant Bank.
Bankunan Da Babu Kuɗin Ruwa:
- Jaiz Bank
- Lotus Bank
- TAJBank
