Gwamnan Babban Bankin Nijeriya (CBN) Olayemi Cardoso, ya bayyana lambar yabo ta musamman Ƙungiyar Tattalin Arzikin Nijeriya (NES) ta bai wa CBN a matsayin tabbaci na ingancin manufofin da bankin ya aiwatar, da kuma ƙoƙarin sa na tabbatar da daidaiton tattalin arzikin ƙasa.
NES ta damƙa kyautar ga CBN ne a taron shekara-shekara na 67 na NES, wanda aka gudanar a Abuja daga ranar 7 zuwa 10 ga Satumba, 2026.
Daraktan Sashen Manufofin Kuɗi na CBN, Dakta Victor Oboh, shi ne ya karɓi kyautar a madadin CBN.
Karramawar dai ta zo a daidai lokacin da CBN ke aiwatar da jerin sauye-sauye a fannoni da suka haɗa da manufofin kuɗi, kasuwar musayar kuɗaɗen waje da kuma harkokin kuɗi a cikin shekaru uku da suka gabata.
Daga cikin matakan da NES ta yaba da su akwai sauye-sauyen da aka yi a kasuwar musayar kuɗaɗen waje, biyan tsoffin basussukan da suka shafi kuɗaɗen waje na biliyoyin daloli, dakatar da amfani da tsarin da CBN ya riƙa ɗirka wa gwamnatin tarayya bashi, wato ‘Ways and Means’, aiwatar da Burin Tsarin Biyan Kuɗi na 2028 (PSV 2028) da kuma nasarar ƙarfafa jarin bankuna.
A cewar ƙungiyar, waɗannan matakai na nufin samar da ingantaccen tsarin kuɗi mai ƙarfi, juriya ga matsaloli da kuma iya yin gogayya a matakin tsarin kuɗi ko ƙalubale a duniya.
NES ta kuma lura da samun ci gaba a wasu muhimman alamomin tattalin arziki, ciki har da raguwar matsin hauhawar farashi, ƙarfafa ajiyar kuɗaɗen waje na ƙasa da kuma ƙarin daidaito a kasuwar musayar kuɗaɗen waje.
Ƙungiyar ta ce tazarar da ke tsakanin farashin kuɗaɗen waje a kasuwar hukuma da ta bayan fage ta ragu zuwa ƙasa da kashi biyu cikin 100, yayin da aka samu ci gaba wajen shigowar kuɗaɗen da ’yan Nijeriya ke aikowa daga ƙasashen waje, ƙarin yawan zuba jari daga ƙasashen waje da kuma amincewar masu zuba jari ga tattalin arzikin ƙasar.
CBN ya danganta waɗannan sauye-sauye da matakan manufofin da yake ci gaba da aiwatarwa, waɗanda aka tsara domin dawo da amincewa da tattalin arzikin ƙasa tare da ƙarfafa tsarin kuɗi da na hadahadar kuɗaɗen Nijeriya.
Karramawar NES ta zo ne bayan CBN ya samu lambar yabo ta Gwarzon Banki na Duniya, shaidar da ke ƙara nuna yadda ake gane sauye-sauyen da bankin ke aiwatarwa da kuma manufofin sa.
Da yake magana kan kyautar, Cardoso ya bayyana ta a matsayin amincewa da jajircewar CBN wajen tabbatar da nagarta, ƙarfafa tsarin hukumomi da kuma bayar da gudunmawa ga ci gaban ƙasa.
Gwamnan ya ce: “Kyautar Girmamawa ta NES shaida ce kan jajircewar Babban Bankin Nijeriya wajen neman nagarta, ƙarfafa juriyar hukumar sa da kuma sadaukar da kai ga ci gaban ƙasa.”
Ya ƙara da cewa kyautar ta ƙara ƙarfafa aniyar bankin wajen tabbatar da daidaiton tattalin arziki, samar da ingantaccen tsarin kuɗi da kuma bunƙasa tattalin arziki mai ɗorewa.
Cardoso ya ce: “Yayin da yake ci gaba da aiwatar da sauye-sauye da kuma samar da sabbin hanyoyi domin cika nauyin da aka ɗora masa, CBN zai ci gaba da jajircewa wajen gina tattalin arziki mai ƙarfi da kuma kyakkyawar makoma ga Nijeriya.”
