Sarkin Zazzau, Alhaji Ahmed Nuhu Bamalli, ya ce an yi wa rawar da tsohon Gwamnan Jihar Kaduna, Nasir El-Rufai, ya taka wajen zamowar sa Sarkin Zazzau mummunar fahimta.
Ya ce alaƙar da ke tsakanin su ta samo asali ne musamman daga dangantakar iyali.
Bamalli, wanda a watan Oktoba zai cika shekaru shida a kan karagar mulki, ya bayyana cewa El-Rufai ɗan’uwan mahaifin sa ne, yana mai jaddada cewa bai kamata a fassara alaƙar tsohon gwamnan da shi da cewa ita ce ta haifar da naɗa shi sarki ba.
Ya ce: “Ni kawun sa ne. Ni ɗan’uwan mahaifin sa ne. Ni da Shugaban Majalisar Wakilai, Abbas Tajudeen, mu ne kawunnan shi. Wannan ce alaƙar da ke tsakanin mu.”
Sarkin ya bayyana hakan ne a wata hira da ya yi da jaridar Weekend Trust, gabanin cikar shekaru shida da hawan sa karagar mulki.
Bamalli ya ce sau da yawa ana fahimtar yanayin da ya kai ga naɗa shi sarauta ba daidai ba, musamman saboda a lokacin da marigayi Sarkin Zazzau, Shehu Idris, ya rasu a watan Satumba 2020, shi yana ƙasar waje.
A lokacin, yana aiki a matsayin Jakaden Nijeriya a Thailand, tare da wakilcin Nijeriya a Myanmar, kuma dole ne ya yi shirye-shiryen dawowa gida a lokacin da aka saka dokar kulle sakamakon annobar korona.
A cewar sa, sai da ya biya dala 9,000 domin dawowa Nijeriya tare da matar sa da ’ya’yan sa mata biyu, saɓanin iƙirarin cewa El-Rufai ne ya yi hayar jirgin sama domin dawo da shi gida.
“Ni ne na biya; rasiɗan suna nan. Ko kuma ku bincika Ofishin Jakadancin Nijeriya da ke Bangkok. Su ne suka biya kuɗin dawowa ta gida ni da iyali na. Mun biya dala 9,000 kuma muka dawo gida,” in ji shi.
Bamalli ya ce rawar da El-Rufai ya taka ta bayyana ne bayan ya iso filin jirgin sama na Abuja, inda wani mataimakin gwamnan mai suna Peter ya gan shi tare da sanar da tsohon gwamnan cewa ya iso.
Ya ce daga nan El-Rufai ya ba da umurnin cewa motocin sa su kai Zariya shi da iyalin sa, bayan mutumin da aka tura ɗauko shi daga filin jirgin ya rasa jirgin sa.
Sai dai Sarkin ya ce tun kafin hakan ya riga ya yi shirin tafiya Kaduna ta jirgin ƙasa, kafin daga bisani ya amince da tayin da aka yi masa.
Sarkin ya kuma bayyana cewa tun farko bai yi niyyar shiga takarar neman sarautar ba, sai dai daga bisani aka matsa masa ya shiga tseren neman gadon sarautar.
