Wani sabon takun-saƙa ya ɓarke tsakanin tsohon Shugaban Ƙasa Olusegun Obasanjo da tsohon Mataimakin Shugaban Ƙasa Atiku Abubakar kan zargin wani shirin tsige Obasanjo daga mulki a lokacin gwamnatin sa.
Obasanjo ya yi zargin cewa Atiku ya bai wa marigayi tsohon Kakakin Majalisar Wakilai, Ghali Umar Na’Abba, Naira miliyan biyar domin ya fara shirin tsige shi daga muƙami a wa’adin sa na farko.
Tsohon shugaban ya yi wannan zargi ne yayin da yake mayar da martani ga kalaman tsohon gwamnan Jihar Ogun, Olusegun Osoba, kan wasu al’amurran siyasa da suka gabaci babban zaɓen shekarar 2003.
A cewar Obasanjo, shirin tsige shi ya samo asali ne daga cikin fadar shugaban ƙasa bayan Atiku ya yi wata ganawar sirri da Na’Abba.
Ya ce tsohon mataimakin shugaban ƙasar ya shawo kan marigayi kakakin cewa ya kamata ya yi wa’adi ɗaya kacal a matsayin shugaban ƙasa, sannan ya ƙarfafa masa gwiwar fara shirin tsige shi.
“Shirin tsige ni da Na’Abba ya fara ya samo asali ne a fadar shugaban ƙasa ta hannun mataimakin shugaban ƙasa, wanda a ranar Juma’a lokacin da ban kasance a ofis ba, ya gayyaci Na’Abba zuwa ofishin sa, ya kuma shawo kan sa kamar yadda ya shawo kan kan sa da wasu kaɗan marasa tasiri cewa ya kamata in yi wa’adi ɗaya kacal a matsayin shugaban ƙasa,” inji Obasanjo.
“A ranar Juma’ar, Atiku ya gayyaci Na’Abba, ya ba shi Naira miliyan biyar domin ya fara aikin tsige ni. An lura da komai, an rubuta komai, sannan babban jami’in ma’aikata na, wanda ƙwararren jami’in leƙen asiri ne, ya kai min rahoto.”
Obasanjo ya ce an rubuta bayanan taron da kuma yadda aka yi cinikin kuɗin, kuma babban jami’in ma’aikatan sa ne ya sanar da shi, wanda ya bayyana a matsayin ƙwararren jami’in leƙen asiri.
Ya ƙara da cewa bai damu da barazanar tsige shi ba saboda ya yi imanin babu wani dalili bisa kundin tsarin mulki da zai ba da damar cire shi daga muƙami.
Raɗaɗin Atiku
Da yake mayar da martani a cikin wata sanarwa da babban mataimakin sa na musamman kan hulɗa da jama’a, Phrank Shaibu, ya fitar a yau Juma’a, Atiku ya soki Obasanjo kan yin wannan zargi bayan rasuwar Na’Abba, yana mai cewa marigayin ba ya raye domin ya kare kan sa.
Ya ce: “A matsayin mu na ’yan Afrika, mun san muhimmancin faɗin gaskiya game da mamata.”
“Saboda haka, abin damuwa ne matuƙa yadda tsohon Shugaba Obasanjo ya zaɓi wannan lokaci don yin zargin cewa na bai wa marigayi Rt. Hon. Ghali Umar Na’Abba cin hanci domin ya tsige shi.
“Idan wannan zargi gaskiya ne, me ya sa bai taɓa bayyana shi ba lokacin da Rt. Hon. Na’Abba yake raye? Me ya sa sai bayan mutuwar mutumin da shi kaɗai zai iya tabbatar ko ƙaryata wannan zargi?
“Ta hanyar jingina wannan babban zargi ga mutumin da ya rasu a matsayin babbar shaida, tsohon Shugaba Obasanjo ya hana ’yan Nijeriya damar jin ɗaya ɓangaren labarin.”
Atiku ya ce zargin bai yi wa tarihin Na’Abba adalci ba domin tsohon kakakin ba zai iya kare mutuncin sa ko mayar da martani ga zargin karɓar cin hanci ba.
Tsohon mataimakin shugaban ƙasar ya kuma yi tambayar dalilin da ya sa ba a taɓa ɗaukar wani matakin shari’a a kan sa ba idan da gaske akwai hujjojin da ke tabbatar da zargin.
Ya ce: “Idan har da gaske akwai hujjojin aikata laifi kamar yadda ake zargi, ’yan Nijeriya suna da haƙƙin tambayar dalilin da ya sa gwamnatin da ke da cikakken ikon ƙasa ba ta ɗauki wani mataki ba a lokacin.”
Atiku ya ce lokacin da Obasanjo ya fito da wannan zargi ya nuna cewa manufar sa ita ce ɓata masa suna tare da bai wa ɗan takarar sa fifiko a gabanin babban zaɓen shekarar 2027.
“A wannan lokaci da siyasar da za ta kai ga babban zaɓen 2027 ke fara ɗaukar salo, a bayyane yake manufar ita ce a ɓata mini suna da mutunci tare da bai wa ɗan’uwan tsohon shugaban ƙasa wata fa’idar siyasa da bai cancanta ba,” inji shi.
“Amma ’yan Nijeriya sun fi haka wayewa. Ba za a iya ruɗar su da tsofaffin zarge-zarge da aka sake tayarwa saboda wata manufa ta siyasa ba.”
Tsohon mataimakin shugaban ƙasar ya kuma ce ci gaba da ƙin jinin da Obasanjo ke nuna masa ya samo asali ne daga yadda ya yi adawa da yunƙurin wa’adi na uku da tsohon shugaban ya nemi yi.
“Laifi na shi ne na tsaya tsayin daka wajen adawa da yunƙurin wa’adi na uku wanda ya saɓa wa kundin tsarin mulki. A matsayi na na ɗan dimokiraɗiyya, na zaɓi bin kundin tsarin mulki da doka,” inji shi.
“Maimakon in sadaukar da ƙa’idojin dimokiraɗiyya saboda wata buƙata ta ƙashin kai, na kare kundin tsarin mulki, kuma na samu nasara a kotuna a wasu manyan shari’o’i da na yi da shugaban ƙasa mai ci a lokacin.
“Waɗannan shari’o’in sun zama wani ɓangare na tarihin dimokiraɗiyyar Nijeriya. A bayyane yake cewa har yanzu tsohon Shugaba Obasanjo bai rabu da ɗacin ran da ya samo asali daga wancan lokaci ba.”
Atiku ya ce ba zai bari a shagaltar da shi da rikice-rikicen siyasa na fiye da shekaru 20 da suka gabata ba, alhali ’yan Nijeriya suna fama da tsadar rayuwa, rashin tsaro, rashin aikin yi da kuma ƙaruwa a bashin gwamnati.
“Aikin da ke gaban shugabanni a yau ba wai sake rubuta tarihi ba ne, sai dai ceto makomar ƙasa. ’Yan Nijeriya sun fi son sanin dalilin da ya sa farashin abinci ke ci gaba da tashi, me ya sa bashin gwamnati ke ƙaruwa duk da ƙarin kuɗaɗen shiga, da kuma dalilin da ya sa gwamnatin yanzu ke fuskantar ce-ce-ku-ce iri-iri, fiye da komawa kan saɓanin siyasa na fiye da shekaru ashirin da suka gabata,” inji shi.
Ya ƙara da cewa Obasanjo na da ’yancin goyon bayan duk ɗan takarar da yake so a zaɓen 2027, amma ya kamata ya bayyana hakan a fili maimakon dogaro da zarge-zargen da ba za a iya tantancewa ba saboda babban shaidar ya rasu.
“Idan tsohon Shugaban Ƙasa Obasanjo ya zaɓi ɗaukar wata matsaya ta siyasa gabanin zaɓen 2027, ya kamata kawai ya bayyana ta a fili ya bar ’yan Nijeriya su yi hukunci a kan ta bisa cancantar ta, maimakon ƙoƙarin rinjayar ra’ayin jama’a ta hanyar zarge-zargen da ba za a iya gwada sahihancin su ba saboda babban shaidar ba ya raye,” inji shi.
“Har yanzu hankalin mu na kan gabatar da ingantattun zaɓuɓɓuka, kare dimokiraɗiyya, neman a tsare gaskiya, da kuma haɗa kai da dukkan ’yan Nijeriya masu kishin ƙasa domin dawo da shugabanci nagari, mai gaskiya da kuma mai sanya muradun jama’a a gaba.
“’Yan Nijeriya suna buƙatar mafita ga matsalolin yau, ba wai sake tada tsofaffin tatsuniyoyin siyasa na jiya ba.”
