Mataimakin Shugaban Ƙasa, Sanata Kashim Shettima, ya bayyana cewa aikin noman ciyawar Premium Alfalfa wadda kamfanin Jigawa El-Meena Farms (JEFs) ke aiwatarwa a Jihar Jigawa na iya zama mafita mai ɗorewa ga rikicin manoma da makiyaya a Nijeriya.
Shettima ya bayyana hakan ne yayin da ya ziyarci rumfar baje kolin kamfanin a taron Tattalin Arziki da Zuba Jari na Jihar Jigawa (J-Invest 2026), wanda aka gudanar a birnin Dutse.
Ya ce samar da ciyawar alfafa a babban sikeli zai tabbatar da wadataccen abincin dabbobi, rage dogaro da kiwon dabbobi a fili, tare da inganta tsarin kiwo na zamani a faɗin ƙasar.
“Tare da wannan gagarumin aikin noman ciyawar alfafa mai inganci da kamfanin Jigawa El-Meena Farms ke gudanarwa, rikicin manoma da makiyaya zai iya zama tarihi,” inji Mataimakin Shugaban Ƙasar.
Ya ƙara da cewa irin wannan zuba jari zai taimaka wajen bunƙasa samar da abinci, ƙarfafa zaman lafiya, da kuma haɓaka tattalin arzikin ƙasa.
Masana sun bayyana cewa wadataccen abincin dabbobi mai inganci zai ƙarfafa tsarin kiwon dabbobi na zamani, tare da rage matsin lamba kan filayen noma da albarkatun ruwa, waɗanda galibi ke haddasa rikice-rikice tsakanin manoma da makiyaya.
A cewar su, aikin noman alfafa yana da muhimmiyar rawa wajen inganta harkokin kiwo, ƙara yawan amfanin dabbobi da kuma samar da zaman lafiya tsakanin al’ummomin manoma da makiyaya.
Kamfanin Jigawa El-Meena Farms yana da burin samar da ciyawar alfafa domin biyan buƙatun masana’antun sarrafa madara da masu kiwon dabbobi, tare da mayar da Jihar Jigawa cibiyar samar da abincin dabbobi da fitar da shi zuwa ƙasashen Yammacin Afrika.
Taron J-Invest 2026 ya samu halartar manyan jami’an gwamnati, masu zuba jari, abokan hulɗar ci gaba da shugabannin kasuwanci, inda aka baje kolin damarmakin zuba jari a fannoni daban-daban na tattalin arziki.
Har ila yau, Shettima ya jaddada ƙudirin Gwamnatin Tarayya na samar da kyakkyawan yanayi ga masu zuba jari tare da tallafa wa ayyukan da za su bunƙasa samar da abinci, samar da ayyukan yi da kuma ci gaban tattalin arzikin Nijeriya.
