GUSAU – Rahotanni daga majiyoyin tsaro sun tabbatar da kashe wani fitaccen shugaban ‘yan bindiga da aka fi sani da Kachalla Sani Yellow a Jihar Zamfara, bayan wani samame da aka gudanar bisa bayanan sirri.
Majiyoyin suka ce an kashe Sani Yellow ne a wani shiri na musamman da dakarun tsaro na haɗaka, masu aiki tare da jami’an tsaro, suka aiwatar bayan samun bayanan sirri daga mazauna yankin.
An ce an yi masa kwanton ɓauna ne yayin da ake zargin ya je wata kasuwa domin karɓar kuɗaɗen shanun da aka sace da kuma kuɗin fansa daga mutanen da aka yi garkuwa da su.
Bayan kashe shi, rahotanni sun ce wasu daga cikin dakarun haɗakar sun ja gawar sa a ƙasa kan babur yayin da suke murnar nasarar da suka samu kan ɗaya daga cikin shugabannin ‘yan bindigar da suka daɗe suna addabar yankin.
A cewar majiyoyin, rundunar haɗakar ta ƙunshi masu sa-kai daga al’umma da kuma wasu tsofaffin mayaƙan Boko Haram da suka tuba, waɗanda ke aiki tare da jami’an tsaro wajen tattara bayanan sirri da kuma kai hare-hare kan sansanonin ‘yan bindiga a wasu yankunan Arewa-maso-Yamma.
An bayyana Sani Yellow a matsayin ɗaya daga cikin manyan jagororin ‘yan bindiga da ke gudanar da hare-hare a dazukan ƙananan hukumomin Anka, Bukkuyum da Maru da kuma wasu sassan Jihar Zamfara.
Ana zargin sa da jagorantar hare-haren da suka yi sanadin rasa rayuka, sace mutane domin neman kuɗin fansa, satar dabbobi da kuma tilasta dubban mazauna karkara barin muhallan su.
Wasu majiyoyin al’umma sun kuma zarge shi da jagorantar ƙungiyar da ke cin zarafin waɗanda aka sace, ciki har da mata, musamman idan iyalan su sun gaza biyan kuɗin fansa.
Rahotanni sun kuma nuna cewa Sani Yellow yana da alaƙa da marigayi Kachalla Yellow Ɗanbokolo, wani shahararren shugaban ‘yan bindiga da aka ruwaito an kashe a shekarar 2025 tare da sama da mayaƙan sa 170 a wani samame da dakarun sa-kai na yankin Shinkafi suka kai.
Bayan aukuwar lamarin, jami’an tsaro sun ƙara tsaurara matakan sa-ido a yankunan da abin ya shafa domin daƙile duk wata yiwuwar harin ramuwar gayya daga sauran ‘yan ƙungiyar.
Haka kuma an ƙara tura jami’an tsaro zuwa wuraren da ake ganin na cikin haɗari domin kare rayuka da dukiyoyin al’umma.
Har zuwa lokacin kammala wannan rahoto, hukumomin tsaro ba su fitar da wata sanarwa a hukumance game da kashe Sani Yellow ba.
