Ƙungiyar kare haƙƙin bil’adama ta Amnesty International ta yi kira ga hukumomin Nijeriya da su gaggauta gudanar da bincike cikin gaskiya da adalci kan kisan gillar da aka yi wa Shugaban Ƙungiyar Makiyaya ta Miyetti Allah ta Nijeriya (MACBAN) na Jihar Binuwai, Alhaji Arɗo Risku Muhammad, da wani abokin sa.
A cikin wata sanarwa da ta fitar a yau Asabar, ƙungiyar ta bayyana lamarin a matsayin abin takaici matuƙa, tana mai cewa abin damuwa ne yadda halartar taron zaman lafiya ya koma tarko na mutuwa.
Amnesty International ta ce binciken da ta gudanar ya nuna cewa hukumomin Ƙaramar Hukumar Ohimini sun gayyaci Arɗo Risku zuwa wani taron tsaro da aka gudanar ranar Juma’a, 26 ga Yuni, 2026, domin tattauna batutuwan da suka shafi zaman lafiya da tsaro a yankin.
Ƙungiyar ta ce kimanin awa guda bayan kammala taron, yayin da marigayin da abokin sa suke kan hanyar su ta komawa gida, sai wasu da ake zargin mahara ne suka tare su a ƙauyen Okudu, inda aka ce sun harbe su sau da dama kafin daga bisani suka kashe su.
Amnesty International ta ce hotunan gawarwakin waɗanda aka kashe da ta samu sun nuna mummunan ta’addanci da ya wuce misali.
Ƙungiyar ta bayyana cewa wannan hari ya biyo bayan wani hari da aka kai wa ɗaya daga cikin ‘ya’yan marigayin mako guda da ya gabata, wanda aka bar shi da munanan raunuka masu barazana ga rayuwar sa.
Ƙungiyar ta yi gargaɗin cewa rashin gudanar da cikakken bincike kan lamarin zai ƙara ƙarfafa al’adar rashin hukunta masu aikata laifuffuka.
Ta ce: “Ba za a bari a yi biris da wannan lamari ba. Dole ne hukumomin Nijeriya su gaggauta gudanar da bincike mai inganci kan wannan kisan tare da gurfanar da duk waɗanda ake zargi da hannu a ciki.”
Ƙungiyar ta buƙaci hukumomi da su tabbatar da cewa iyalan waɗanda aka kashe sun samu adalci da kuma hanyoyin biyan haƙƙin su.
Har zuwa lokacin haɗa wannan rahoto, gwamnatin Jihar Binuwai da hukumomin tsaro ba su fitar da wata sanarwa kan zarge-zargen da Amnesty International ta yi ba.
