Shugaban Ƙasa, Bola Ahmed Tinubu, ya sanya hannu kan Dokar Hukumar Kula da Shaidar Ɗan Ƙasa ta Ƙasa (NIMC) ta shekarar 2026 a jiya Juma’a, lamarin da ya kafa sabon tsarin shaidar ɗan ƙasa na zamani, mai tsaro kuma mai bai wa kowa dama, domin tallafa wa bunƙasar tattalin arzikin dijital na Nijeriya.
A cikin sanarwar da ya fitar, Shugaban Ƙasar ya ce sabuwar dokar ta maye gurbin tsohon tsarin doka da aka yi amfani da shi wajen gudanar da tsarin tantance shaidar ‘yan ƙasa na kusan shekaru ashirin, yana mai cewa tsohuwar dokar ba ta ƙara dacewa da burin Nijeriya na wannan zamani ba.
Tinubu ya ce sabuwar dokar ta bai wa Hukumar NIMC muhimmiyar rawa a Tsarin Ababen More Rayuwa na Jama’a na Dijital da kuma Tsarin Maɓallan Tsaro na Jama’a na Ƙasa, wanda zai samar da ingantaccen tushe na tabbatar da sahihancin shaidar mutane, gudanar da mu’amaloli cikin tsaro, sanya hannu ta hanyar dijital da kuma bunƙasa tattalin arzikin dijital.
Ya ce dokar ta ƙara ƙarfafa kariyar bayanan sirri na ‘yan ƙasa ta hanyar hana samun damar amfani da bayanan ba tare da ƙa’ida ba, amfani da su fiye da manufar da aka tattara su saboda ita, ko sarrafa su ba tare da yardar mai bayanan ko bin ƙa’idar doka ba.
“Ya zama wajibi a kare sirrin ‘yan Nijeriya, kuma wannan doka ta tabbatar da hakan,” inji Shugaba Tinubu.
Ya bayyana cewa a ƙarƙashin sabuwar dokar, Lambar Shaidar Ɗan Ƙasa (NIN) za ta zama muhimmiyar hanyar samun manyan ayyuka da hidimomi, ciki har da neman fasfo, rajistar masu zaɓe, buɗe asusun banki, cinikin filaye, ayyukan sadarwa, fansho, inshora, biyan haraji, samun rancen kuɗi da sauran ayyukan gwamnati.
Shugaban Ƙasar ya sake jaddada manufar gwamnati ta tabbatar da cewa kowane ɗan Nijeriya yana da shaida guda ɗaya mai inganci, yana mai bayyana hakan da kalmomin, “Mutum ɗaya. Shaida ɗaya. Lamba ɗaya.”
Tinubu ya ce ya bayar da takamaiman umurni cewa sabuwar dokar ta kare masu rauni, waɗanda ba su da cikakken damar samun ayyuka da kuma ‘yan Nijeriya mazauna ƙasashen waje, yana mai jaddada cewa bai kamata a hana kowane ɗan ƙasa samun damar cigaba saboda rashin ingantacciyar shaida ba.
Ya ƙara da cewa dokar ta inganta tsarin shugabanci a NIMC ta hanyar faɗaɗa wakilci a kwamitin gudanarwar hukumar, ƙarfafa tsarin riƙon amana da kuma tanadar da hukunci mai tsauri ga masu aikata laifukan satar bayanan shaida, yin rajista fiye da sau ɗaya, shiga tsarin ba tare da izini ba da kuma cin zarafin tsarin shaidar ɗan ƙasa.
“Ba za mu lamunci masu ƙirƙirar shaidun bogi, masu satar shaidar wasu ko masu cin zarafin wannan tsari ba,” inji shugaban.
Tinubu ya yaba wa Majalisar Dokoki ta Tarayya, Ministan Harkokin Cikin Gida, Hukumar NIMC, abokan hulɗar cigaba da dukkan ‘yan Nijeriya bisa gudunmawar da suka bayar wajen tabbatar da samar da wannan muhimmiyar doka.
Ya bayyana dokar a matsayin wani babban cigaba da zai taimaka wajen gina Nijeriya mai cikakken tsaro, wadda kowa yake da damar cin moriyar ta kuma mai bunƙasar tattalin arziki, tare da ciyar da manufofin gwamnatin sa na Renewed Hope Agenda gaba.
