Mataimakin Shugaban Ƙasa, Sanata Kashim Shettima, ya wakilci Shugaba Bola Ahmed Tinubu wajen ƙaddamar da kashi na farko na aikin titin Kuje zuwa Gwagwalada mai layi biyu, a Babban Birnin Tarayya, Abuja.
Da yake jawabi a wajen taron ƙaddamarwar, Shettima ya bayyana cewa gwamnatin Tinubu tana ci gaba da shimfiɗa tubalin cigaba da bunƙasa tattalin arzikin Nijeriya ta hanyar aiwatar da muhimman ayyukan more rayuwa a Abuja da sauran sassan ƙasar nan.
Ya ce Gwamnatin Tarayya ta himmatu wajen samar da cigaba mai ɗorewa da zai amfani al’umma baki ɗaya, tare da tabbatar da cewa babu wata al’umma ko wani yanki da za a bari a baya wajen rabon ayyukan raya ƙasa.
A cewar sa, gwamnatin tana aiki tuƙuru domin gina Nijeriya mai cigaba, wadata da kyakkyawar makoma ga kowa da kowa, ta hanyar zuba jari a muhimman fannoni da suka haɗa da tituna, sufuri da sauran abubuwan more rayuwa.
Shettima ya ƙara da cewa ayyukan tituna da sauran manyan ayyukan more rayuwa na daga cikin muhimman matakan da gwamnati take ɗauka domin sauƙaƙa rayuwar al’umma, ƙarfafa harkokin kasuwanci da kuma bunƙasa tattalin arzikin ƙasa baki ɗaya.
