Hukumar Alhazai ta Ƙasa (NAHCON) ta yi kira ga dukkan maniyyatan Nijeriya da ke gudanar da aikin Hajjin bana da su tabbatar sun sayi dabbobin hadaya ta hanyar dandalin Nusuk Masar ko kuma cibiyoyin sayarwa da Hukumar Kula da Ayyukan Hadaya da Adahi ta Masarautar Saudiyya ta amince da su.
Hukumar ta jaddada cewa bai kamata mahajjata su yi hulɗa da mutane ko ƙungiyoyin da ba su da izini wajen saye, talla, ko gudanar da duk wani aiki da ya shafi Hadaya da Adahi ba.
NAHCON ta bayyana cewa wannan mataki an ɗauke shi ne domin kare mahajjata daga zamba, damfara da sauran hanyoyin cutarwa, tare da tabbatar da cewa an kiyaye haƙƙoƙin su a lokacin gudanar da ibadun Hajji.
Hukumar ta kuma buƙaci mahajjatan da su yi amfani da hanyoyin da aka amince da su kawai domin tabbatar da cewa an gudanar da ibadar Hadaya da Adahi yadda Shari’ar Musulunci ta tanada tare da bin dokoki da ƙa’idojin Masarautar Saudiyya.
Haka zalika, an umurci Hukumomi da Hukumar Jin Daɗin Alhazai na Jihohi, Hukumomin Hajji da Umrah, Kwamitocin Alhazai da kuma Kamfanonin Shirya Hajji da su wayar da kan mahajjata tare da tabbatar da cikakken bin wannan umurnin.
NAHCON ta yi addu’ar Allah ya karɓi ibadun mahajjata baki ɗaya, ya ba su Hajji Mabrur, ya kuma dawo da su gida lafiya.
