Hukumar Tsaro da Kariya ta Farar Hula ta Nijeriya (NSCDC) ta samu cikakken umurnin kotu na rufe dukkan rassan wasu kamfanonin ‘yan Chana masu suna Inner Galaxy Steel Company da Jiuxing Integrity Industrial Ltd a faɗin ƙasar nan sakamakon ta’annatin da suke yi wa tattalin arzikin ƙasar nan ta hanyar satar ƙarafa.
Jami’in Hulɗa da Jama’a na Ƙasa na NSCDC, Afolabi Babawale, ya bayyana a cikin wata sanarwa cewa: “Wannan mataki na nuna ƙara tsaurara matakin Gwamnatin Tarayya kan ta’ammali da ta’addancin tattalin arziki, satar kayayyakin more rayuwa, da kuma zargin tallafa wa ayyukan ta’addanci da kuɗi.”
Mutanen da ake zargi da alaƙa da wannan ƙungiya suna fuskantar manyan tuhume-tuhume na laifuffuka da suka haɗa da:
- Haɗa baki wajen aikata babban laifi da sata,
- Ganganci wajen jefa lafiyar matafiya ta jirgin ƙasa cikin haɗari
- Hana aiki, lalata da jikkata kayayyakin layin dogo
- Gaza bayar da rahoto ko bayanai ga jami’in gwamnati
- Karɓa da taimakawa wajen ɓoye kayan sata da aka samu ta haramtacciyar hanya
- Taimakawa da ba da kuɗin tallafi ga ƙungiyoyin ta’addanci domin aikata ayyukan ta’addanci
- Aiwatar da umurnin kotu da ƙwato kadarori
Bayan sun samu takardun bincike da umurnin kotu, jami’an rundunar Commandant General’s Special Intelligence Squad (CG’S SIS) sun kai samame cibiyar kamfanin da ke Birnin Yero, Ƙaramar Hukumar Igabi, Jihar Kaduna inda suka ƙwato dukkan kayayyakin layin dogo da aka sata aka sayar wa da kamfanin, ciki har da railway sleepers da layukan dogo.
An tara su tare da miƙa su ga Hukumar Jiragen Ƙasa ta Nijeriya (NRC) domin amfani da su a matsayin muhimman hujjoji a shari’a.
Bayanai daga furucin ma’aikatan da aka kama sun nuna cewa akwai wata hanyar safarar kayayyaki da aka tsara, inda ake kai kayan more rayuwar ƙasa da aka lalata zuwa hedikwatar kamfanin da ke Aba da sauran rassan sa domin narkar da su. Daga nan kuma ana sarrafa ƙarfen da aka sace zuwa kayayyakin kasuwanci kamar ƙusoshi da kwanon rufi.
Sakamakon wannan bincike, an faɗaɗa umurnin rufe kamfanonin da gudanar da bincike zuwa:
- Hedikwatar Inner Galaxy Steel Company / Jiuxing Integrity Industrial Ltd da ke ƙauyen Ahala Ukwa, Umuahala Community, Obuzor Ukwu, Ukwa West LGA, Jihar Abia)
- Cibiyar Arewa na Inner Galaxy Steel Company da ke Tashar Rawayya, Gusau, Jihar Zamfara
- Dukkan sauran rassan kamfanonin da ƙananan kamfanonin su a faɗin Nijeriya
NSCDC ta gayyaci ’yan ƙasar Chaina da ke da hannu wajen tafiyar da wannan katafaren kamfani a rubuce domin amsa tambayoyi, amma sun ƙi zuwa.
NSCDC ta gayyaci ’yan ƙasar Chaina da ke da hannu wajen tafiyar da wannan katafaren kamfani a rubuce domin amsa tambayoyi, amma sun ƙi zuwa.
Babban Kwamandan NSCDC na ƙasa, Farfesa Ahmed Abubakar Audi, ya bayar da kakkausan umurni ga kwamandan da ke kula da rundunar CG’S SIS, Mista Appollos Ɗandaura, domin tabbatar da jami’ai sun gudanar da wannan aiki cikin ƙwarewa da jajircewa.
Ya ce: “Duk wanda aka samu da laifi wajen wannan al’amari da zubar da dukiyar al’ummar ƙasa zai fuskanci cikakken hukuncin doka. NSCDC tana ci gaba da jajircewa wajen rage lalata kayayyakin more rayuwa zuwa mafi ƙanƙanta.”
NSCDC ta bayyana matuƙar godiyar ta ga ɓangaren shari’a bisa gaggawar bayar da waɗannan umurnin doka, wanda ya taimaka wajen hana katsalandan ga muhimman hujjoji.
Haka kuma, hukumar ta yaba wa kafafen yaɗa labarai bisa muhimmiyar gudunmawar su wajen fallasa waɗannan laifuffukan tattalin arziki da tabbatar da gaskiya da riƙon amana ga jama’a.
Ta kuma yi kira ga jama’a da su ci gaba da haɗa kai da hukumar ta hanyar bayar da sahihan bayanai cikin lokaci domin kawo ƙarshen satar kayayyakin more rayuwa.
