Ƙungiyar Birnin-Gwari Vanguard for Security and Good Governance ta bayyana godiya ga Gwamnan Jihar Kaduna, Sanata Uba Sani, bisa samun amincewar Gwamnatin Tarayya na fara sake gina hanyar Mando–Kaduna zuwa Birnin-Gwari mai tsawon kilomita 122, wanda kuɗin sa ya kai naira biliyan 178, wani muhimmin sashe na babbar hanyar Kaduna zuwa Legas.
A wata sanarwa da shugaban ta, Ibrahim Abubakar Nagwari, ya fitar a ranar Juma’a, ƙungiyar ta tuna da alƙawarin da Shugaba Bola Ahmed Tinubu ya yi a lokacin da ya kai ziyara Birnin-Gwari kafin babban zaɓen 2023, tana mai cewa: “Yanzu, ƙarƙashin jagorancin Gwamna Uba Sani mai ma’ana, ana cika wannan alƙawari. Wannan hanya za ta inganta haɗin kai, ƙarfafa ayyukan tsaro, sauƙaƙa ayyukan noma, tare da dawo da amincewa ga al’ummomin da suka daɗe suna fama da wariya.”
Ƙungiyar ta ƙara da cewa: “Muna kuma yaba wa Gwamnatin Jihar Kaduna kan gina hanyar Bagoma zuwa Gagumi mai tsawon kilomita 36 a yammacin ƙasar Birnin-Gwari, da kuma kafa kasuwar shanu ta zamani da mayanka a garin Birnin-Gwari.
“Waɗannan ayyuka ba wai kawai tsare-tsare na ɗan lokaci ba ne, illa sun zama ginshiƙai na dindindin da za su tabbatar da makoma mai wadata, tsaro, da haɗin kai ga al’ummar mu.”
“Muna matuƙar farin ciki da jajircewar Gwamna Uba Sani wajen wanzar da zaman lafiya mai ɗorewa bayan sama da shekaru goma sha biyar na zubar da jini, garkuwa da mutane, da fashi ta hanyar tsarin Kaduna Peace Model wanda al’umma ke jagoranta.
“An ga sakamakon a zahiri: cikin watanni goma sha takwas da suka gabata, matafiya sun riƙa zirga-zirga cikin kwanciyar hankali a kan hanyar Birnin-Gwari zuwa Kaduna ba tare da rakiyar jami’an tsaro ba.
“Ayyukan noma sun samu gagarumin cigaba, inda aka share sababbin gonaki domin noman bana.
“Gwamnatin Jihar Kaduna ta nuna cikakkiyar jajircewa wajen aiwatar da waɗannan ayyuka yadda ya kamata. Muna gode wa Shugaban Ƙasa bisa tsayin daka da ya yi ga Jihar Kaduna da kuma cigaban ƙasa baki ɗaya cikin adalci.
“Muna kira ga Gwamnatin Jihar Kaduna da ta ci gaba da ƙarfafa tsarin Kaduna Peace Model ta hanyar ci gaba da hulɗa mai inganci da al’ummomi domin sulhu, warkar da raunuka, da bunƙasa cigaba.”
