Mai Shari’a Rilwan Aikawa na Babbar Kotun Tarayya da ke zaman ta a Kaduna ya bayar da beli ga tsohon gwamnan jihar, Malam Nasir El-Rufai.
Kotun ta kuma bayar da umurni cewa tsohon gwamnan zai ci gaba da kasancewa a hannun Hukumar Yaƙi da Cin Hanci da Rashawa, wato Independent Corrupt Practices and Other Related Offences Commission (ICPC), har sai an cika dukkan sharuɗɗan beli.
Kotun ta yanke cewa za a ci gaba da tsare wanda ake tuhuma a hannun ICPC har sai an cika dukkan sharuɗɗan beli gaba ɗaya.
A matsayin wani ɓangare na sharuɗɗan, dole masu tsaya masa su ajiye fasfo ɗin su a kotu.
Alƙalin ya kuma umurci cewa dole ne ɗaya daga cikin masu tsaya masa ɗin ya kasance ma’aikacin gwamnati wanda bai kai ƙasa da matakin aiki na GL 15 ba, yayin da ɗayan kuma dole ne ya kasance sanannen sarki ko shugaban gargajiya.
Bugu da ƙari, an hana El-Rufai yin duk wata magana a bainar jama’a dangane da shari’ar, sannan dole ne ya halarci dukkan zaman kotu.
Lauyan tsohon gwamnan, Ubong Akpan, ya ƙi yin tsokaci lokacin da ’yan jarida suka tuntuɓe shi bayan kammala zaman kotun.
Sai dai ɗan El-Rufai, wato Bello El-Rufai, ya tabbatar da cewa an bai wa mahaifin nasa beli.
Haka kuma, wani jigo na jam’iyyar African Democratic Congress (ADC), Hayatudeen Maƙarfi, ya tabbatar da wannan lamarin, yana mai cewa belin ya zo tare da sharuɗɗa masu yawa, ciki har da buƙatun kuɗi, kadarorin ƙasa, da kuma shigar da wani sanannen basarake a matsayin mai tsaya masa.
Ya jaddada cewa dole ne a cika dukkan sharuɗɗan kafin tsohon gwamnan ya samu ’yanci, ya ƙara da cewa El-Rufai zai ci gaba da kasancewa a hannun ICPC har sai an cika sharuɗɗan.
Shi dai El-Rufa’i, ana tuhumar sa ne da laifukan almundahana na kuɗi, ciki har da zargin saka kuɗi a asusun ajiyar sa na ƙasar waje da kuma yadda Hukumar Yaƙi da Cin Hanci da Rashawa (ICPC) ta gudanar da bincike kan kuɗaɗen shigar sa.
Sai dai kuma, an dakatar da yanke hukunci kan neman belin sa a Babbar Kotun Jihar Kaduna, domin alƙalin kotun, Mai Shari’a Darius Khobo, ya ɗage yanke hukunci kan belin zuwa ranar 21 ga Afrilu, 2026.
An gurfanar da tsohon gwamnan a gaban babbar kotun jihar ne kan tuhume-tuhume da dama da suka shafi zargin damfara da kuma cin zarafin muƙami da ICPC ta ɗora masa.
Hukumar ICPC ta gurfanar da shi a ranar 18 ga Maris, 2026, tare da Manajan Darakta na kamfanin TMDK Terminal Limited, Amadu Sule, a gaban Babbar Kotun Jihar Kaduna, ƙarƙashin lamba ta ƙara KDH/KAD/ICPC/01/26.
Tuhume-tuhumen da aka fara gabatarwa sun haɗa da zargin cin amanar muƙami, damfara, yunƙurin aikata damfara, da kuma ba da wata fa’ida ta musamman ba bisa ƙa’ida ba.
Sai dai a ranar Litinin, masu gabatar da ƙara sun gyara tuhume-tuhumen, inda suka cire Sule daga cikin shari’ar, suka taƙaita shari’ar ga El-Rufai shi kaɗai.
An kai El-Rufa’i gaban kotun jihar ne a ranar Litinin, 13 ga Afrilu, 2026, ta hannun jami’an ICPC da na DSS. Yana fuskantar tuhume-tuhume guda tara bayan an yi gyara a ƙarar da masu gabatar da ƙara suka shigar.
Dangane da takardun kotun Jihar Kaduna, ɗaya daga cikin manyan zarge-zargen shi ne cewa tsohon gwamnan ya amince da fitar da kimanin naira biliyan 11 daga kuɗaɗen Jihar Kaduna zuwa wata ƙungiya da ba a yi mata rajista ba domin wani aikin ƙaramin layin jirgin ƙasa wanda bai kammala ba.
Haka kuma, masu gabatar da ƙara sun zarge shi da amincewa da karɓar naira miliyan 289.8 a matsayin alawus na barin aiki, adadin da aka ce ya zarce ƙa’ida, inda aka ƙayyade kusan naira miliyan 20 ne kawai, wanda hakan ya ba shi wata fa’ida ta kuɗi ba bisa ƙa’ida ba.
A wata tuhumar, ana zargin sa da karkatar da sama da dala miliyan 1.08 daga cikin rancen da Bankin Duniya ya bai wa Jihar Kaduna, wanda hakan ya saɓa da sharuɗɗan amfani da rancen.
Sai dai El-Rufai ya musanta dukkan zarge-zargen.
A zaman kotu na ranar Litinin, lauyoyi masu kare shi, ƙarƙashin jagorancin Barista Ubong Akpan, sun nuna damuwa kan jinkirin da aka yi wajen ba su sababbin tuhume-tuhumen, suna mai cewa an ba su su ne a cikin kotu kawai.
Wannan ya sa alƙalin kotun, Mai Shari’a Darius Khobo, ya ɗage shari’ar domin bai wa ɓangaren kariya isasshen lokaci domin su nazarci sababbin takardun.
