Wani rahoto da Babban Bankin Nijeriya (CBN) ya fitar a yau Alhamis, ya ce kamfanoni a faɗin Nijeriya sun bayyana cewa ƙarancin wutar lantarki da rashin tsaro su ne manyan ƙalubalen da ke addabar harkokin su a cikin watan Maris 2026, duk da cewa har yanzu suna da kyakkyawar fata game da tattalin arzikin ƙasar nan.
Rahoton ya ce: “Kashi 74.5 na masu amsa tambayoyin sun bayyana ƙarancin wutar lantarki ce babbar matsala, yayin da kashi 70.9 suka danganta rashin tsaeo, sai haraji mai yawa ko ninki-ninki ya samu kashi 69.2 na laifin matsalolin da suka addabi harkokin kasuwanci.
“Sannan kashi 66.6 na ganin ladar biyan kuɗaɗen da aka ranta a banki, wato ‘interest’ da matsalolin kuɗi ita ma matsala ce mai zaman kan ta.
“Sai kuma kashi 64.3 a matsayin manyan ƙalubale biyar da ke fuskantar kasuwanci a watan Maris 2026, suna nuna abubuwan da ke shafar daidaito da riba na ayyukan kasuwanci.”
An gudanar da binciken tsakanin ranakun 9 zuwa 13 ga Maris 2026, inda aka tattara bayanai daga kamfanoni 1,900 a fannoni daban-daban kamar masana’antu, ayyuka da noma, tare da samun kaso 99.7% na masu amsawa tambayoyin.
Duk da waɗannan ƙalubale, kamfanoni sun ci gaba da nuna kyakkyawan fata game da tattalin arzikin ƙasa.
CBN ya bayyana cewa ma’aunin amincewa ya tsaya a maki 15.6 a watan Maris, wanda ke nuna kyakkyawan fata, duk da cewa ya ragu kaɗan idan aka kwatanta da watan da ya gabata na Fabrairu.
Ana sa ran wannan fata zai ƙaru zuwa maki 43.9 cikin watanni shida masu zuwa.
A binciken fannoni daban-daban, dukkan sassa sun nuna amincewa da yanayin tattalin arziki, inda fannin noma ya fi kowa nuna kyakkyawan fata a wannan watan. Haka nan, ana sa ran dukkan fannoni za su ci gaba da nuna kyakkyawan ci gaba a nan gaba da kuma nan ba da daɗewa ba.
Dangane da yankuna, binciken ya nuna cewa yankin Arewa maso Gabas ne ya fi nuna kyakkyawan fata da maki 39.4, yayin da Kudu maso Gabas ya nuna rashin kyakkyawan fata da maki –5.5.
Sai dai, ana sa ran dukkan yankuna za su samu ingantuwar yanayi a watanni masu zuwa.
Rahoton ya kuma nuna cewa kamfanoni na sa ran ƙaruwa a ayyukan kasuwanci. Masu amsa tambayoyin sun nuna kyakkyawan fata game da yawan oda, ayyukan kasuwanci, yanayin kuɗin su, da samun bashi, tare da hasashen samun ƙarin ci gaba cikin watanni shida masu zuwa.
A ɗaukar ma’aikata da faɗaɗa kasuwanci, kamfanoni sun nuna shirin ƙara ɗaukar ma’aikata a watan Afrilu 2026 sakamakon hasashen faɗaɗa ayyuka. Fannin ma’adinai da haƙar duwatsu ya fi nuna ƙarfi wajen ɗaukar ma’aikata, yayin da noma ya fi nuna shirin faɗaɗa kasuwanci.
Duk da haka, CBN ya jaddada cewa ƙalubalen tsarin tattalin arziki na ci gaba da yin tasiri ga ayyukan kasuwanci. Baya ga matsalar wutar lantarki da rashin tsaro, kamfanoni sun kuma ambaci tsadar cajin bankuna, sai kuma tsauraran dokokin tattalin arziki da rashin tabbas a harkokin siyasa a matsayin ƙarin manyan ƙalubale.
CBN ya ce sakamakon binciken ya nuna buƙatar gyare-gyare a fannoni masu muhimmanci.
Rahoton ya bayyana cewa ra’ayoyin da aka tattara na kamfanoni ne kawai, kuma ba lallai ne su yi daidai da matsayar CBN ba.
