Gwamnatin Tarayya ta kare harin jirgin sama da Rundunar Sojin Sama ta Nijeriya ta kai a ranar 11 ga Afrilu a yankin Jilli da ke Ƙaramar Hukumar Gubio a Jihar Borno, tana mai cewa an kai harin ne kan ’yan ta’adda bisa sahihan bayanan sirri.
Ministan Yaɗa Labarai da Wayar da Kai, Alhaji Mohammed Idris, shi ne ya bayyana hakan a wata sanarwa da aka fitar ranar Talata.
Ya bayyana cewa yankin Jilli, wanda aka daɗe ana danganta shi da ayyukan ’yan ta’adda, ya kasance wurin da ƙungiyoyin Boko Haram da ISWAP suke amfani da shi wajen tsara hare-hare da gudanar da harkokin su.
A cewar sa, an kai harin ne bayan an shafe makwanni ana sa ido da tattara bayanan sirri, wanda ya tabbatar da kasancewar ’yan ta’adda a yankin, domin daƙile ayyukan su.
Yayin da take kare harin, Gwamnatin Tarayya ta jajanta wa iyalan waɗanda abin ya shafa, tare da bayyana asarar rayukan fararen hula a matsayin abin takaici.
Idris ya ce: “Kowace rayuwar ɗan Nijeriya mai daraja ce, kuma duk wata asarar rayuwar fararen hula abin takaici ne matuƙa”.
Ya ƙara da cewa an ba da umurnin gudanar da cikakken bincike domin duba yadda aka tattara bayanai da kuma yadda aka aiwatar da harin, tare da ɗaukar matakan da suka dace idan an samu kurakurai.
“Kare rayukan fararen hula babban abu ne da ya rataya a wuyan rundunonin tsaro,” inji shi.
Gwamnatin ta kuma ce tana aiki tare da hukumomin jihohi da na agajin gaggawa domin tallafa wa al’ummomin da abin ya shafa, tare da ƙarfafa matakan kariya.
Ta buƙaci jama’a da su bi ƙa’idojin tsaro tare da guje wa wuraren da aka hana shiga saboda barazanar tsaro.
Gwamnatin ta sake jaddada aniyar ta ta ci gaba da yaƙi da ta’addanci tare da inganta yadda ake gudanar da ayyukan tsaro.
